اەس سالۋدى قولداۋ جونىندەگى حالىق شتابى وڭىرلەردە تۇرعىندارمەن كەزدەسۋدى جالعاستىرىپ جاتىر. بۇگىن كوكشەتاۋدا شتاب مۇشەلەرى قۇتقارۋشىلارمەن، ەڭبەك ۇجىمدارىمەن، مەديسينا سالاسىنىڭ قىزمەتكەرلەرىمەن جانە ارداگەرلەرمەن كەزدەسىپ، اتوم ەلەكتر ستانسياسىنىڭ ارتىقشىلىقتارى تۋرالى پىكىر الماستى.
پوليمەردەن جۇمساق قاپتاما شىعاراتىن «نوۆوپەك» ج ش س زاۋىتىنىڭ ەڭبەك ۇجىمىمەن كەزدەسۋدە، شتاب مۇشەلەرى ونەركاسىپتىك كاسىپورىنداردىڭ جۇيەلى جۇمىس ىستەۋى ءۇشىن تۇراقتى ەنەرگيامەن جابدىقتاۋدىڭ ماڭىزدىلىعىن اتاپ ءوتتى. ءماجىلىس دەپۋتاتى، «AMANAT» پارتياسى فراكسياسى جەتەكشىسىنىڭ ورىنباسارى پاۆەل كازانسيەۆ اەس – جاڭا جوبا عانا ەمەس، سونىمەن قاتار ينۆەستورلاردى تارتۋعا جانە جاڭا جۇمىس ورىندارىن اشۋعا قاجەت ۇزاق مەرزىمدى شەشىم ەكەنىن ايتتى.
"ءبىز اسا ماڭىزدى ماسەلەلەر شەشىلەتىن داۋىردە ءومىر ءسۇرىپ جاتىرمىز. ونىڭ ءبىرى – اتوم ەنەرگەتيكاسى. ەلىمىزدىڭ وڭتۇستىك وڭىرلەرىندە ەلەكتر ەنەرگيا تاپشىلىعى پايدا بولدى. اتالعان ايماقتاردا گيدروەنەرگەتيكانى قامتاماسىز ەتەتىن قۋاتتى وزەندەر دە، كومىر وندىرىلەتىن كەن ورىندارى دا جوق. ياعني، بىردەن-بىر دۇرىس شەشىم – اەس قۇرىلىسى. كۇن مەن جەل ەنەرگياسىن ءقازىردىڭ وزىندە پايدالانىپ كەلەمىز. الايدا، ولار – تۇراقسىز. بۇگىن شايداي اشىق اسپاندى ەرتەڭ بۇلت تورلاپ تۇرادى. اتوم ەنەرگەتيكاسىنىڭ بارلىق باسقا ەنەرگيا كوزىنەن ايىرماشىلىعى سول، ول ۇزاق جىل تۇراقتى ءارى قۋاتتى ەنەرگيامەن قامتاماسىز ەتە الادى. بۇل – جاي عانا قاجەتتىلىك ەمەس، زامان تالابى. ميلليونداعان ادامنىڭ جارقىن بولاشاعىن قامتاماسىز ەتكىمىز كەلسە، ءبىز ودان باس تارتا المايمىز"، – دەدى حالىق قالاۋلىسى پاۆەل كازانسيەۆ.