الماتى قالاسىنىڭ الاتاۋ اۋدانىنداعى وقۋشىلاردىڭ يننوۆاسيالىق شىعارماشىلىق ورتالىعىندا پرەزيدەنت كەڭەسشىسى مالىك وتاربايەۆ الماتى ءبىلىم باسقارماسى مەن پەداگوگتار قاۋىمىمەن ماڭىزدى كەزدەسۋ وتكىزدى. كەزدەسۋ بارىسىندا مەملەكەت باسشىسىنىڭ جولداۋىندا ايتىلعان ءبىلىم بەرۋ جانە ماماندار دايارلاۋ ماسەلەلەرىمەن قاتار، اتوم ەلەكتر ستانسياسىن سالۋ بويىنشا رەفەرەندۋمعا ەرەكشە نازار اۋدارىلدى.
مالىك وتاربايەۆ الداعى رەفەرەندۋمنىڭ – ەلدىڭ دەموكراتيالىق دامۋ جولىنداعى ماڭىزدى قادام ەكەنىن باسا ايتتى. ول ءاربىر ازاماتتىڭ داۋىسى ۇلكەن مانگە يە بولىپ، ورتاق ناتيجەگە تىكەلەي اسەر ەتەتىنىن اتاپ ءوتتى. بۇل رەفەرەندۋم – شىنايى دەموكراتيانىڭ ايقىن كورىنىسى ەكەنىن اتاپ ءوتتى.
– اتوم ەلەكتر ستانسيالارى الەمنىڭ كوپتەگەن ەلدەرىندە بار، جانە ولاردىڭ كوپشىلىگىندە بۇل ماسەلەگە قاتىستى رەفەرەندۋمدار وتكىزىلمەگەن. بۇل اتوم ەنەرگياسىن پايدالانۋ قاتاڭ ستاندارتتار مەن قاۋىپسىزدىك شارالارىمەن رەتتەلەتىن تاجىريبە ەكەنىن كورسەتەدى. قازاقستان دا وسى قاۋىپسىزدىك تالاپتارىن ساقتاي وتىرىپ، دامۋدىڭ جاڭا كەزەڭىنە اياق باسىپ وتىر. الايدا، مەنىڭشە، وسىنداي ماڭىزدى ماسەلەلەر بويىنشا رەفەرەندۋم وتكىزۋ – قاجەتتىلىك. حالىقتىڭ پىكىرىن ءبىلۋ جانە ونى ەسكەرۋ – دەموكراتيالىق مەملەكەت ءۇشىن وتە ماڭىزدى، – دەدى پرەزيدەنت كەڭەسشىسى مالىك وتاربايەۆ.
سونىمەن قاتار، ول اتوم ەنەرگياسىن پايدالانۋ ماسەلەسىندە قاۋىپسىزدىك شارالارىنىڭ اسا ماڭىزدى ەكەنىن ەسكە سالدى. قازىرگى زاماناۋي تەحنولوگيالار بۇل سالادا ۇلكەن جەتىستىكتەرگە قول جەتكىزگەنىن، ال حالىقارالىق تاجىريبە قاتاڭ ستاندارتتار نەگىزىندە جۇزەگە اسىرىلىپ جاتقانىن اتاپ ءوتتى.
كەزدەسۋدە مالىك وتاربايەۆ اتوم ەلەكتر ستانسياسىن سالۋدىڭ ەل ەكونوميكاسىنا، عىلىم مەن بىلىمگە بەرەر مۇمكىندىكتەرىن دە تىلگە تيەك ەتتى. اەس قۇرىلىسى تەك ەنەرگەتيكالىق تۇراقتىلىقتى قامتاماسىز ەتىپ قانا قويماي، جاڭا جۇمىس ورىندارىن اشىپ، عىلىمي-زەرتتەۋ سالالارىنىڭ دامۋىنا سەرپىن بەرەتىنىنە توقتالدى.