Satbayev University قاۋىمداستىرىلعان پروفەسسورى ينەش كەنجينا اتوم ەنەرگەتيكاسىن قازاقستاننىڭ ەنەرگەتيكالىق قۇرىلىمىنا ەنگىزۋ ارقىلى ەلدىڭ سو2 شىعارىندىلارىن ايتارلىقتاي ازايتۋعا جانە پاريج كەلىسىمى بويىنشا حالىقارالىق مىندەتتەمەلەردى ورىنداۋعا مۇمكىندىك بەرەتىنىنە سەنىمدى ەكەنىن ايتتى، دەپ حابارلايدى aqshamnews.kz
– ەنەرگەتيكا قۇرىلىمىن وسىلايشا ءارتاراپتاندىرۋ ەلەكتر ەنەرگياسىن تۇتىنۋ كولەمىندە كومىر گەنەراسياسىنىڭ ۇلەسىن ايتارلىقتاي ازايتادى. بۇل تەك جاڭارتىلاتىن ەنەرگيا كوزدەرى مەن گاز گەنەراسياسى ارقىلى عانا ەمەس، سونىمەن قاتار اتوم گەنەراسياسىنىڭ ارقاسىندا جۇزەگە اسادى. مۇنىڭ بارلىعى ەكولوگيالىق تۇرعىدان ۇلكەن اسەر بەرەدى، – دەپ مالىمدەدى ينەش كەنجينا.
ساراپشىنىڭ پىكىرىنشە، اەس ەنگىزۋ ەلدىڭ ەنەرگەتيكالىق تاۋەلسىزدىگىن ارتتىرىپ، حالىقارالىق ەكولوگيالىق تالاپتارعا ساي بولۋعا مۇمكىندىك بەرەدى. قازىرگى تاڭدا الەمنىڭ كوپتەگەن ەلدەرى، سونىڭ ىشىندە فرانسيا، كانادا جانە جاپونيا، اتوم ەنەرگەتيكاسىن قولدانۋ ارقىلى وزدەرىنىڭ كومىرتەك ىزدەرىن قىسقارتۋدا. قازاقستاندا دا وسى جولمەن ءجۇرۋ ارقىلى كومىرتەك بەيتاراپتىلىعىنا جەتۋگە ىقپال ەتەتىن ماڭىزدى قادام جاسالادى.
ينەش كەنجينانىڭ ايتۋىنشا، قازاقستان 2060 جىلعا دەيىنگى كومىرتەك بەيتاراپتىعى بويىنشا ءوز ستراتەگياسىن جۇزەگە اسىرۋدا، ال اتوم ەنەرگەتيكاسى بۇل ماقساتقا جەتۋدىڭ باستى فاكتورلارىنىڭ ءبىرى بولماق. سونىمەن قاتار، جاڭارتىلاتىن ەنەرگيا كوزدەرىمەن بىرگە اتوم ەنەرگياسى ەلدىڭ ەنەرگيا جۇيەسىن تۇراقتى ءارى سەنىمدى ەتەدى.
– قازاقستاننىڭ تابيعي رەسۋرستارعا باي بولۋى، سونىڭ ىشىندە ۋران قورىنىڭ مولدىعى، ءوزىمىزدىڭ اتوم ەلەكتر ستانسيالارىن دامىتۋعا جانە ەنەرگيانى ەكسپورتتاۋ الەۋەتىن ارتتىرۋعا مۇمكىندىك بەرەدى، – دەپ اتاپ ءوتتى كەنجينا.