Satbayev Universityء-دىڭ جالپى فيزيكا كافەدراسىنىڭ مەڭگەرۋشىسى ايدوس لەسبايەۆ قازاقستاندا اتوم ەلەكتر ستانسياسىن سالۋ قاجەتتىگىن قولدايدى، دەپ حابارلايدى aqshamnews.kz
– ارينە، مۇنداي شەشىمدەر حالىقتىڭ كەلىسىمىنسىز قابىلدانباۋى ءتيىس. قازاقستاندىقتاردى رەفەرەندۋمدا ءوز پىكىرىن بىلدىرۋگە شاقىرامىن. مەنىڭ پىكىرىم: اتوم ەلەكتر ستانسياسى ەلىمىزدىڭ ەنەرگەتيكالىق تاۋەلسىزدىگىن قامتاماسىز ەتۋگە مۇمكىندىك بەرەدى. ۋاقىتتىڭ شىنايىلىعى مەن تەحنولوگيالىق دامۋدىڭ قارقىنى جاڭا دامۋ باعىتتارىن تالاپ ەتەدى. قازىرگى تاڭدا ەلەكتر قۋاتىنسىز ەشتەڭە جۇمىس ىستەمەيدى: ينتەرنەتتەن باستاپ ەلدەگى ءىرى پروسەستەردىڭ، سونىڭ ىشىندە اسكەري، تاۋ-كەن ونەركاسىبى، مەديسينا سالالارىن باسقارۋعا دەيىن – ءبارى ەلەكتر ەنەرگياسىنا بايلانىستى. مەن قازاقستاننىڭ ەنەرگەتيكالىق تاۋەلسىزدىگىنە اتوم ەلەكتر ستانسياسىن سالۋ ارقىلى قول جەتكىزۋگە بولادى دەپ ەسەپتەيمىن، – دەپ اتاپ ءوتتى ايدوس لەسبايەۆ.