عالىمدار العاش رەت زەرتحانادا ادام ءتىسىن ءساتتى ءوسىردى.
King’s College London جانە Imperial College London ۋنيۆەرسيتەتتەرىنىڭ عالىمدارى ادام ءتىسىن زەرتحانالىق جاعدايدا ءساتتى ءوسىرىپ شىعاردى، دەپ حابارلايدى aqshamnews.kz.
بۇل جاڭالىق ستوماتولوگيا الەمىندە توڭكەرىس جاساپ، تىستەردى قالپىنا كەلتىرۋدىڭ تابيعي ءارى ءتيىمدى ءادىسىن ۇسىنا الادى.
بۇل زەرتتەۋ 10 جىلدان استام ۋاقىت بويى جۇرگىزىلگەن. بۇعان دەيىنگى ارەكەتتەر ساتسىزدىككە ۇشىراپ كەلدى. سەبەبى ءتىس جاسۋشالارى بىر-بىرىمەن ءتيىمدى بايلانىس ورناتا المادى. ءبىراق ءقازىر زەرتتەۋشىلەر ارنايى گيدروگەل جاساپ شىعاردى — ول جاسۋشالاردىڭ بايلانىسىپ، ءتىس قۇرىلىمىن (ەمال، دەنتين، تامىرلار) دامىتۋىنا جاعداي جاسايدى.
وسى تۇرعىدا عالىمدار نە دەيدى؟
پلومبالار ءتىس قۇرىلىمىن السىرەتەدى، ولاردىڭ قىزمەت ەتۋ مەرزىمى شەكتەۋلى، ءارى كەيىنگى ءتىس شىرۋىنە نەمەسە سەزىمتالدىققا سەبەپ بولۋى مۇمكىن. يمپلانتتار بولسا، ءينۆازيۆتى وتا تالاپ ەتەدى جانە ءاردايىم تولىق تابيعي فۋنكسيانى قالپىنا كەلتىرە المايدى. ال زەرتحانادا وسىرىلگەن تىستەر اعزاعا بيولوگيالىق تۇرعىدان ۇيلەسىمدى، بەرىك ءارى ۇزاق مەرزىمدى شەشىم. ولار ناعىز ءتىس سياقتى جاق سۇيەككە تابيعي تۇردە بىرىگىپ كەتەدى، - دەيدى King’s College London زەرتتەۋشى سيۋەچەن چجان.
چجان بولاشاقتا ءتىستى اۋىز قۋىسىنا ورنالاستىرۋدىڭ ەكى جولىن قاراستىرىپ جاتقانىن ايتتى. بىرىنشىدەن، جاس ءتىس جاسۋشالارىن تىكەلەي ءتىس جوق جەرگە سالىپ، ولاردىڭ سول جەردە تابيعي وسۋىنە مۇمكىندىك بەرۋ. ەكنىشىدەن، تولىققاندى ءتىستى زەرتحانادا ءوسىرىپ، كەيىننەن عانا پاسيەنتكە سالۋ.
ءبىراق ەكى جاعدايدا دا بىزگە ءتىستىڭ ەڭ باستاپقى دامۋ پروسەسىن زەرتحانادان باقىلاي باستاۋ قاجەت، — دەيدى ول.
رەگەنەراتيۆتى ستوماتولوگيا ءبولىمىنىڭ جەتەكشىسى انا انجەلوۆا ۆولپوني دە كەلەشەكتە ستوماتولوگيادا ۇلكەن وزگەرىستەر بولاتىنىن ايتادى.
بۇل سالا دامي كەلە، مۇنداي يننوۆاسيالىق ادىستەردى ەنگىزۋ ارقىلى ستوماتولوگيالىق كومەك تۇبەگەيلى وزگەرەدى. بۇل ءتىستى قالپىنا كەلتىرۋ مەن قايتا ءوسىرۋدىڭ ءتيىمدى ءارى ۇزاق مەرزىمدى جولى، - دەيدى ول.
عالىمدار زەرتحانادا وسىرىلگەن تىستەردىڭ باستى ارتىقشىلىقتارى كوپ دەيدى. ولار: تابيعي تۇردە قايتا ءوسۋ قابىلەتى، ناعىز ءتىس سياقتى قۇرىلىمى مەن قىزمەتى، يممۋندىق جۇيە تاراپىنان كەرى قابىلدانۋ ءقاۋپى جوق. سونداي-اق، زەرتتەۋشىلەر وسىرىلگەن تىستەر پلومبا مەن يمپلانتقا قاراعاندا ۇزاق قىزمەت ەتەتىنىن العا تارتادى.
عالىمدار قازىرگى ۋاقىتتا جانۋارلارعا سىناق جۇرگىزىپ جاتىر. ەگەر بۇل كەزەڭ ءساتتى وتسە، ادامدارعا ارنالعان كلينيكالىق سىناقتار 2028 جىلعا قاراي باستالۋى مۇمكىن دەپ بولجانعان.
بۇل جاڭالىق ستوماتولوگيا مەن بيومەديسينا سالاسىندا جاڭا ءداۋىردىڭ باستاماسى بولۋى مۇمكىن. كەلەشەكتە ادامدار ءتىس جۇلدىرۋ نەمەسە يمپلانت سالدىرۋدىڭ ورنىنا ءوز تىستەرىن قايتا وسىرە الاتىن دەڭگەيگە جەتەتىنى انىق.