بۇل جايىندا سەۋلدە وتكەن ۇشقىشسىز ۇشاقتاردىڭ ءۇشىنشى كورمەسىندە ايتىلدى.
وندا قالالىق اۋە كولىگىنىڭ بولاشاعى تالقىلاندى، دەپ حابارلايدى Almaty-akshamy.kz 24.kz سايتىنا سىلتەمە جاساپ.
جىل سايىن درونداردىڭ جىلدامدىعى ارتىپ كەلەدى. وڭتۇستىك كورەيادا ۇشقىشسىز ۇشاقتار جاڭا قولدانىس تاپتى. ولار تەاتر قويىلىمدارى كەزىندە قولدانىلادى. دروندار ارتيستەردى الماستىرىپ، قۇستار مەن جۇلدىزداردى بەينەلەي الادى. سونداي-اق ۇشاقتار جارىس، كەدەرگىلەردەن ءوتۋ جانە فۋتبول سىندى ويىنداردا پايدالانىلادى. سپورتشىلار تەك درونداردى باسقارۋ عانا ەمەس، ولاردى قۇراستىرا دا ءبىلۋى ءتيىس. دروندار قىزىق ويىنشىقتان الىپ قارۋعا اينالدى. ءقازىر كورەيا دا جاۋىنگەرلىك ۇشاقتار جاساۋدا. ەلدەگى العاشقى ستەلس-دروننىڭ 70 پايىزى دايىن.
«ءبىز جاساندى ينتەللەكتى بار دروندى جاساپ شىعاردىق. ونىڭ سالماعى نەبارى 2 كەلى جانە ول تىكەلەي رەجيمدە وبەكتىلەر مەن ادامداردىڭ ورنالاسقان جەرىنىڭ ناقتى كوورديناتتارىن بەرە الادى. فەرمەرلەر مەن توتەنشە جاعدايلار قىزمەتكەرلەرىنە كومەكتەسەتىن دروندار كوبەيىپ كەلەدى. مىنا قۇرىلعى ادام قولى جەتپەيتىن جەرلەردە ءورت سوندىرگىش سۇيىقتىقتى شاشادى»، - دەيدى كومپانيا پرەزيدەنتى چون دجين حو.
«ءبىزدىڭ درون ەلەكتر قۋاتىمەن جۇمىس ىستەيتىندىكتەن، پارنيكتىك گازداردى شىعارمايدى. ساعاتىنا 320 شاقىرىم جىلدامدىق سەۋلدەن ينچحونعا دەيىن 50 شاقىرىمدى 15 مينۋتتا باعىندىرۋعا مۇمكىندىك بەرەدى. باتارەيانى 10 مينۋت ىشىندە تولىق زاريادتاۋعا بولادى. قازىرگى ۋاقىتتا ۇشقىشسىز ۇشاقتىڭ سىيىمدىلىعى 7 ورىن، ءبىراق ءبىز جولاۋشىلار سانىن 15-كە جەتكىزۋ ءۇشىن جۇمىس ىستەپ جاتىرمىز»، - دەيدى كومپانيا پرەزيدەنتى و سون چول.
قالالىق اۋە كولىگى جوباسىن جۇزەگە اسىرۋ ءۇشىن درون جاسايتىن كومپانيالار ۇكىمەتتەن قارجىلىق قولداۋ، سالىقتىق جەڭىلدىكتەر مەن ەرەجەلەردى جەڭىلدەتۋدى سۇرايدى. بۇل ينفراقۇرىلىم سالۋ مەن قىزمەتكەرلەردى وقىتۋ ءۇشىن قاجەت.
«سالانىڭ دامۋى ءۇشىن قاجەتسىز ەرەجەلەردەن ارىلۋ كەرەك. بىزدە بۇل سالانىڭ الەمدىك كوشباسشىسى بولۋعا جاقسى مۇمكىندىك بار. قالالىق اۋە كولىگى از ادامدارعا ارنالعان كولىك رەتىندە ەمەس، قولجەتىمدى قۇنى مەن ىڭعايلىلىعىمەن جاپپاي قولدانىسقا ەنگزىلەتىن كولىك رەتىندە قاراستىرىلادى دەپ ۇمىتتەنەمىن»، - دەيدى كورەيا جەر، ينفراقۇرىلىم جانە كولىك ءمينيسترى ۆون حي رەن.
قالالىق اۋە قوزعالىسى تۋرالى زاڭ جوباسى كەلەسى ايدا كورەيا پارلامەنتىنە جولدانادى. قۇجات ماقۇلدانسا، جولاۋشىلاردى ۇشقىشسىز ۇشاقتاردا تاسىمالداۋعا 2025 جىلدان باستاپ رۇقسات ەتىلەدى.