بۇل ءىىم باسشىسى مارات احمەتجانوۆتىڭ مالىمدەمەسى.
بۇگىن پرەزيدەنتتىڭ قابىلداۋىندا بولعان مينيستر ەلىمىزدەگى كريمينوگەندىك احۋال جونىندە جانە 30 ماۋسىمدا وتكەن ىشكى ىستەر مينيسترلىگىنىڭ كەڭەيتىلگەن القا وتىرىسىندا بەرىلگەن تاپسىرمالاردىڭ ورىندالۋ بارىسى تۋرالى مالىمەت بەردى، دەپ حابارلايدى Almaty-akshamy.kz
كەزدەسۋدە قاسىم-جومارت توقايەۆقا قىلمىس سانىنىڭ ازايعانى جونىندە باياندالدى. مارات احمەتجانوۆتىڭ ايتۋىنشا، كىسى ءولتىرۋ، بۇزاقىلىق، ۇرلىق، قاراقشىلىق، توناۋ، مال ۇرلىعى، دەنساۋلىققا اۋىر زاقىم كەلتىرۋ جانە باسقا دا قىلمىستار ايتارلىقتاي ازايعان.
پرەزيدەنتكە ەلوردادا ىسكە اسىرىلىپ جاتقان CyberPol جوباسىنىڭ ناتيجەلەرى تانىستىرىلدى. جوبا ينتەرنەت-الاياقتىققا قارسى ءىس-قيمىلدى جەتىلدىرۋگە باعىتتالعان.
سونىمەن قاتار مينيستر ەسىرتكى قىلمىسىنا قارسى كۇرەس باعىتىندا جۇرگىزىلىپ جاتقان جۇمىستاردىڭ قورىتىندىسى تۋرالى ەسەپ بەردى. جىل باسىنان بەرى قۇقىق قورعاۋ جانە ارناۋلى ورگانداردىڭ بىرلەسكەن كۇش-جىگەرىنىڭ ناتيجەسىندە 14،3 توننا ەسىرتكى، سونىڭ ىشىندە 71،5 كەلى گەروين، 652 كەلى سينتەتيكالىق ەسىرتكى تاركىلەندى. سونداي-اق 52 ەسىرتكى زەرتحاناسىن جويىلىپ، 85 توننا پرەكۋرسور تاركىلەندى.
بۇدان بولەك، ۇيىمداسقان قىلمىستىق توپتاردىڭ ارەكەتتەرى بويىنشا 37 قىلمىستىق ءىس تەرگەلىپ جاتىر. ادام ساۋداسىنا بايلانىستى 111 قىلمىس انىقتالدى.
پرەزيدەنتكە وتباسىلىق-تۇرمىستىق سالادا زورلىق-زومبىلىق جاساعاندارعا قاتىستى جاۋاپكەرشىلىكتى قاتاڭداتۋ شارالارى تۋرالى دا ايتىلدى. ءقازىر مۇنداي قۇقىقبۇزۋشىلىقتار جابىرلەنۋشىنىڭ ارىز-شاعىمىنسىز تىركەلىپ، ءىس قوزعالا بەرەدى.
مەملەكەت باسشىسىنا جول-كولىك وقيعالارىنىڭ الدىن الۋ جانە شەتەلدىك اۆتوكولىكتەردى زاڭداستىرۋ جۇمىستارىنىڭ ناتيجەلەرى تۋرالى باياندالدى.
كەزدەسۋ سوڭىندا پرەزيدەنت قۇقىق قورعاۋ ورگاندارىنا ازاماتتاردىڭ كونستيتۋسيالىق قۇقىقتارىنىڭ قاتاڭ ساقتالۋىن قامتاماسىز ەتۋدى تاپسىردى. سونىمەن بىرگە قاسىم-جومارت توقايەۆ ءىىم باسشىلىعىنا قۇقىقتىق ءتارتىپ پەن قوعامدىق قاۋىپسىزدىك دەڭگەيىن ودان ءارى ارتتىرۋ جونىندە ءبىرقاتار مىندەت جۇكتەدى.