بۇگىنگى كۇنى قازاقستاندا ادام پاپيللوماسى ۆيرۋسىنا (اپۆ) قارسى ۆاكسينامەن 11-13 جاس ارالىعىنداعى 54،5 مىڭنان استام قىز بالا ەگىلدى.
قازان ايىنىڭ باسىنان باستاپ ەلىمىزدىڭ ءار وڭىرىندە جاتىر موينى وبىرىنىڭ نەگىزگى قوزدىرعىشى بولىپ تابىلاتىن ادام پاپيللوماسى ۆيرۋسىنا (اپۆ) قارسى 11 جاستاعى قىزدارعا ۆاكسيناسيا جۇرگىزىلۋدە. سونىمەن قاتار، 12-13 جاستاعى قىزدارعا قوسىمشا يممۋنداۋ شارالارى دا وتكىزىلىپ جاتىر.
وڭىرلەر اراسىندا اپۆ-عا قارسى ۆاكسيناسيا بويىنشا تۇركىستان وبلىسى كوش باستاپ تۇر. بۇل ايماقتا 11،1 مىڭنان استام قىز بالا ەگىلدى. شىمكەنت قالاسىندا – 5،3 مىڭ، قاراعاندى وبلىسىندا – 4،3 مىڭ، جامبىل وبلىسىندا – 4 مىڭ، استانا قالاسىندا – 3،7 مىڭنان استام قىز بالاعا ۆاكسينا ەگىلدى.
ۆاكسينا العاندار اراسىندا يممۋنداۋدان كەيىنگى جاعىمسىز اسەرلەر تىركەلگەن جوق.
قازاقستاندا ەكپەلەر مەكتەپتەردەگى مەديسينالىق كابينەتتەردە اتا-انالاردىڭ نەمەسە زاڭدى وكىلدەردىڭ كەلىسىمىمەن جۇرگىزىلەدى. قاجەت بولعان جاعدايدا اتا-انالاردىڭ ءوتىنىشى بويىنشا تىركەلگەن جەرى بويىنشا ەمحانالاردا دا ۆاكسيناسيا جاسالادى.
- اپۆ-عا قارسى پروفيلاكتيكالىق ۆاكسيناسيا جاتىر موينى وبىرى جانە باسقا دا ونكولوگيالىق اۋرۋلاردىڭ الدىن الۋعا كومەكتەسەدى.
- قازاقستاندا جاتىر موينى وبىرى بارلىق جاستاعى ايەلدەر اراسىندا ءسۇت بەزى وبىرىنان كەيىنگى ەكىنشى، ال فەرتيلدى جاستاعى (25-44 جاس) ايەلدەر اراسىندا ءسۇت بەزى وبىرىنان كەيىنگى ءولىمنىڭ ەكىنشى سەبەبى بولىپ تابىلادى.
قوسىمشا جانە سەنىمدى اقپارات الۋ ءۇشىن egu.kz سايتى سياقتى رەسمي دەرەككوزدەردى، ق ر دەنساۋلىق ساقتاۋ مينيسترلىگىنىڭ سانەپيدباقىلاۋ كوميتەتىنىڭ، ۇلتتىق قوعامدىق دەنساۋلىق ساقتاۋ ورتالىعىنىڭ جانە دەنساۋلىق ساقتاۋ باسقارمالارىنىڭ رەسمي پاراقشالارىن پايدالانۋعا كەڭەس بەرەمىز.
سونداي-اق، 7701 كولل-ورتالىعى جۇمىس ىستەيدى. بۇل ورتالىق ارقىلى اپۆ-عا قارسى ۆاكسيناسيا جانە باسقا دا ۆاكسيناسيالارعا قاتىستى سۇراقتارعا جاۋاپ الۋعا بولادى.