ءماجىلىس دەپۋتاتى داۋلەت مۇقايەۆ «اشىق الاڭ» باعدارلاماسىندا ىسىراپشىلدىققا قاتىستى ءوز پىكىرىن ءبىلدىردى.
«استانانىڭ باس مەشىتى مەن حازىرەت سۇلتان مەشىتىندەگى اسحانادا اس بەرەتىن بولساڭىز، ادام باسىنا 20000 تەڭگەگە دەيىن تولەۋگە دايىن بولىڭىز! ادام ولىمىندەگى اس ەمەس، توي جاسايتىن داستارقان! مينيمالدى باعا 7000 تەڭگە. ءبىراق ول كەزدە ەتتى ءوزىڭىز اكەلەسىز. بۇل بيزنەس بولماعاندا نە؟ مىسالى شىعىس قازاقستان، اباي، پاۆلودار وبلىستارىندا داستارقاندا تەك 7-اق اس ءتۇرى بولادى. ودان باسقا ءمازىر جوق! ۇسىنبايدى! نەگە باس قالادا، باسقا ايماقتاردا وسىلاي بولمايدى؟ ەرتە مە، كەش پە كەز كەلگەن ادام باسىنا ءولىم كەلەدى. ودان ەشكىم قۇتىلا المايدى. جەر الۋ، جانازا، اس بەرۋ، زيرات كوتەرۋ… وسىنىڭ ءبارى ءبىر كۇنى الدىڭىزدان شىعاتىن ءدىني جورالعىلار. قازاقستان مۇسىلماندار ءدىني باسقارماسى تاراپىنان بۇل ماسەلە دۇرىس جولعا قويىلماسا، قايعىدان قان جۇتىپ وتىرعان جاندارعا، اقشاسى جوقتارعا ودان سايىن سوققى بولىپ وتىر. ىسىراپشىلدىقتىڭ الدىن الۋ نەگە مەشىتتەردەن باستالمايدى؟!» - دەپ جازدى دەپۋتات ءوزىنىڭ ينستاگرام پاراقشاسىندا.