امەريكا عالىمدارى پاركينسون اۋرۋىنا مەڭزەيتىن ادام داۋىسىنداعى ءۇش وزگەرىستى اتادى
پاركينسون اۋرۋىنىڭ باستاپقى كەزەڭىن ادام داۋىسىنداعى وزگەرىستەردەن بايقاۋعا بولادى، دەپ حابارلايدى Almaty-akshamy.kz ءتىلشىسى ريا نوۆوستيعا سىلتەمە جاساپ.
بۇل تۋرالى دەرەكتەردى پاركينسون اۋرۋى قاۋىمداستىعى كەلتىرگەن.
مامانداردىڭ ايتۋىنشا، وسىنداي كەسەلى بار ادامداردىڭ داۋىستارى باسەڭدەيدى نەمەسە باستاپقىدا داۋىس قاتتىراق شىعىپ، كەيىن اقىرىنداپ قالادى. سونىمەن بىرگە، ادامنىڭ ءسوزى ءبىر سارىندى (ءبىرقالىپتى) بولۋى مۇمكىن، سەبەبى مۇنداي ناۋقاستار ءوزىنىڭ داۋىسىنىڭ قاتتىلىعى مەن سەزىمدىك دەڭگەيىن باقىلاۋدا ۇستاي المايدى. سونىمەن بىرگە، وسى اۋرۋدىڭ ەندى باستالىپ جاتقانىن بىلدىرەتىن تاعى ءبىر وزگەرىس - تۇتىعىپ سويلەۋ.
پاركينسون اۋرۋى-باياۋ داميتىن سوزىلمالى نيەۆرولوگيالىق اۋرۋ. بۇل مي جاسۋشالارىنىڭ دوفامين حيميالىق زاتىن ءوندىرۋىنىڭ بۇزىلۋىنان تۋىندايدى، بۇل ادامنىڭ قوزعالىسىنا جاۋاپ بەرەتىن جاسۋشا فۋنكسياسىنىڭ بۇزىلۋىنا اكەلەدى.
نەگىزگى بەلگىلەرى بۇلشىقەت قاتتىلىعى، گيپوكينەزيا، ترەمور جانە پوستۋرالدى (پوستۋرالنىي نەۋستويچيۆوست) تۇراقسىزدىق بولىپ تابىلادى.
زاماناۋي مەديسينا ازىرگە بۇل اۋرۋدىڭ ەمىن تاپپادى، الايدا ەمدەۋدىڭ كونسەرۆاتيۆتى جانە جەدەل ادىستەرى ناۋقاستاردىڭ ءومىر ساپاسىن ايتارلىقتاي جاقسارتۋعا جانە دەرتتىڭ دامۋىن تەجەۋگە مۇمكىندىك بەرەدى.
بۇكىل الەمدە پاركينسون اۋرۋىنا 10 ميلليونعا جۋىق ادام شالدىققان. بۇل اۋرۋعا شالدىعۋ ءقاۋپى ادام جاسى ۇلعايعان سايىن ارتا تۇسەدى، ءبىراق كەي جاعدايدا 50 جاسقا دەيىنگى ادامداردىڭ 4 %-ىندا وسى اۋرۋ بەلگىلەرى بايقالادى. ايەلدەرگە قاراعاندا ەر ادامدار پاركينسون اۋرۋىنا 1،5 ەسە ءجيى ۇشىرايدى.