مارقۇم بولعانداردىڭ تورتەۋى - قازاقستان ازاماتتارى
قىرعىزستاننىڭ وش وبلىسى نووكات اۋدانىندا سەلدىڭ ءتۇسۋى سالدارىنان قازا تاپقان توعىزىنشى ادامنىڭ دەنەسى تابىلدى، دەپ حابارلايدى اlmaty-akshamy.kz.
ەلدىڭ توتەنشە جاعدايلار مينيسترلىگى باسپا ءسوز قىزمەتىنىڭ حابارلاۋىنشا، 30 ماۋسىمدا ابشىر-اتا اۋىلىندا سەلدەن وپات بولعان توعىزىنشى بالانىڭ دەنەسى تابىلدى. قازىرگى ۋاقىتتا ونىڭ اتى، تەگى جانە تۋعان جىلى انىقتالىپ جاتىر.
Cactus.Media مالىمەتتەرى بويىنشا، 9 ادامنىڭ ەكەۋى ەرەسەك، قالعانى - 2016، 2013، 2012، 2008، 2005 جىلى تۋعان بالالار مەن جاسوسپىرىمدەر. ونىڭ ىشىندە ءتورت قازاقستاندىق بالا بار.
ەستەرىڭىزگە سالا كەتەيىك، جۇما، 28 ماۋسىم كۇنى، قىرعىزستاننىڭ وش وبلىسى نووكات اۋدانىندا سەل ءجۇرىپ ءوتتى. سالدارىنان جولدار، كوپىرلەر قيراپ، تۇرعىن ۇيلەر سۋ استىندا قالدى. قازا تاپقانداردىڭ اراسىندا قازاقستاننان ءتورت بالا بار. «ابشىر-اتا» دەمالىس ايماعىنان 1400 دەمالۋشى ەۆاكۋاسيالاندى. تج رەجيمى جاريالاندى.