ساناۋلى ساتتەر بۇرىن دزيۋدوشى ابيبا ءابۋجاقىنوۆا (48 كگ) قىتايدىڭ حانچجوۋ قالاسىندا ءوتىپ جاتقان ءحىح جازعى ازيا ويىندارىندا كۇمىس جۇلدەگەر اتاندى، دەپ حابارلايدى ق ر تۋريزم جانە سپورت مينيسترلىگى سپورتتى دامىتۋ ديرەكسياسىنىڭ باسپا ءسوز قىزمەتى.
ول فينالدا 3 دۇركىن الەم چەمپونى، 2018 جىلعى دجاكاتاداعى ازيا ويىندارىنىڭ جەڭىمپازى جاپونيالىق ناسۋمو سۋنوداعا ەسە جىبەردى. ءابيبا – ايەلدەر اراسىندا دزيۋدودان سارى قۇرلىق ويىندارىنىڭ فينالىنا شىققان تۇڭعىش سپورتشى.
ۇلتتىق قۇراما سپورتشىسى حانچجوۋداعى العاشقى بەلدەسۋىندە فيليپپين سپورتشىسىن ۆازاري ادىسىمەن، سوسىن، سولتۇستىك كورەيا پالۋانىن ۇتتى. ال جارتىلاي فينالدا وڭتۇستىك كورەيالىق لي حەك ەنگ ەسكەرتۋ الىپ، ءابۋجاقىنوۆاعا جول بەردى.
ايتا كەتەيىك، ابيبا ءابۋجاقىنوۆا بيىل اقپاندا پورتۋگاليادا گران-پري باسەكەسىندە توپ جارعان (ايەلدەر اراسىندا) تۇڭعىش قازاق دزيۋدوشىنا اينالعان. سونداي-اق ول – وتگونسەسەگ گالبادراحتان كەيىن قازاقستاندىق ارۋلار اراسىنان الەم چەمپيوناتىندا مەدال العان سپورتشى.