اباي اتىنداعى قازۇپۋ-دا «دارا» قورىنىڭ قولداۋىمەن ينكليۋزيۆتى ءبىلىم بەرۋدىڭ وقۋ-زەرتتەۋ زەرتحاناسىنىڭ سالتاناتتى اشىلۋى ءوتتى دەپ حابارلايدى almaty-akshamy.kz
ەلىمىزدىڭ جەتەكشى پەداگوگيكالىق ۋنيۆەرسيتەتىنىڭ جاڭا قۇرىلىمىنىڭ ماقساتى – ينكليۋزيۆتى جانە ارنايى ءبىلىم بەرۋ سالاسىندا عىلىمي-زەرتتەۋ جۇمىستارىن ۇيىمداستىرۋ جانە جۇرگىزۋ، ستۋدەنتتەردى وقىتۋ، جاڭا فورماسيانىڭ مەكتەپ مۇعالىمدەرىن، قۇزىرەتتى، تاجىريبەگە باعىتتالعان پەداگوگيكالىق كادرلارىن دايارلاۋدا زەرتحانالىق رەسۋرستار مەن جاڭا سالالىق تەحنولوگيالاردى پايدالانۋ.
شاراعا رەكتور دارحان ءبىلالوۆ، قازاقستان رەسپۋبليكاسىنىڭ ارنايى جانە ينكليۋزيۆتى ءبىلىم بەرۋ ۇيىمدارىنىڭ باسشىلارى، الماتى قالاسى مەن الماتى وبلىسىنداعى ارنايى جانە ينكليۋزيۆتى مەكتەپتەر مەن بالاباقشالاردىڭ ديرەكتورلارى، پەداگوگيكا جانە پسيحولوگيا ينستيتۋتىنىڭ باسشىلىعى مەن وقىتۋشىلارى قاتىستى.
د.ءبىلالوۆ ەرەكشە بالالار مەن ولاردىڭ وتباسىلارىن قولداۋ ءۇشىن ينكليۋزيۆتى ءبىلىم بەرۋدىڭ ماڭىزدىلىعىن اتاپ ءوتتى.
«ءار بالانىڭ فيزيكالىق جاعدايىنا، الەۋمەتتىك-ەكونوميكالىق جاعدايىنا، ەموسيونالدىق ەرەكشەلىكتەرىنە، جىنىسىنا جانە باسقا دا فاكتورلارىنا قاراماستان، ءبىلىم الۋ مۇمكىندىگى بولۋى كەرەك. مەملەكەتتىڭ مىندەتى – بۇل ءۇشىن بارلىق قاجەتتى جاعدايلاردى جاساۋ، پەداگوگيكالىق جوعارى وقۋ ورىندارىنىڭ مىندەتى – ەڭ الدىمەن مەكتەپتەردى ەرەكشە ءبىلىم بەرۋ قاجەتتىلىكتەرى بار بالالاردى وقىتاتىن جوعارى كاسىبي ماماندارمەن قامتاماسىز ەتۋ. جاڭا زەرتحانانىڭ اشىلۋى بۇل باعىتتاعى جۇمىستى جانداندىرىپ، ەلىمىزدەگى ينكليۋزيۆتى ءبىلىم بەرۋدى دامىتۋعا ءوز ىقپالىن تيگىزەتىنىنە سەنىمدىمىن»، - دەدى رەكتور.
«دارا» قورىنىڭ جەتەكشىسى گۇلنار دوسايەۆا ينكليۋزيۆتى ءبىلىم بەرۋدى دامىتۋ ءوزى جەتەكشىلىك ەتەتىن ۇيىمنىڭ نەگىزگى باعىتتارىنىڭ ءبىرى ەكەنىن اتاپ ءوتتى.
«ءبىز مۇعالىمدەرگە، وقۋشىلارعا جانە ولاردىڭ اتا-انالارىنا ينكليۋزيۆتى ءبىلىم بەرۋ كەڭىستىگىن اشا وتىرىپ، قازاقستان رەسپۋبليكاسىنىڭ 50-دەن استام مەكتەبىمەن تىعىز جۇمىس جاسايمىز. بالالاردىڭ وقۋىنا جانە مۇعالىمدەردىڭ كاسىبي جۇمىسىنا قولايلى جاعداي جاساۋ ءۇشىن ءبىز جاڭا ءبىلىم بەرۋ تەحنولوگيالارىن قولدانۋعا تىرىسامىز»، - دەپ اتاپ ءوتتى.
«دارا» قورىمەن ىنتىماقتاستىق اياسىندا زەرتحانانىڭ ءتيىمدى جۇمىس ىستەۋى ءۇشىن وقىتۋشىلاردى، ستۋدەنتتەردى، ماگيسترانتتاردى، دوكتورانتتاردى جانە پراكتيكتەردى تارتۋ جوسپارلانۋدا؛ ەلىمىزدىڭ ارنايى جانە جالپى ءبىلىم بەرەتىن وقۋ ورىندارىمەن ىنتىماقتاستىقتى دامىتۋ؛ بولاشاق مۇعالىمدەردى دۋالدى وقىتۋ، سونىمەن قاتار ەبق بار بالالاردى دياگنوستيكالىق زەرتتەۋ جانە وڭالتۋ.
پەداگوگيكا جانە پسيحولوگيا ينستيتۋتىنىڭ ديرەكتورى عاليا ابايەۆا ينكليۋزيۆتى ءبىلىم بەرۋ زەرتحاناسىن دامىتۋ تۇجىرىمداماسىنا توقتالىپ، سۋردوپەداگوگيكا، وليگوفرەنوپەداگوگيكا، تيفلوپەداگوگيكا، لوگوپەديا ماماندارى زەرتحانانىڭ باعىتتارىمەن جانە مامانداندىرۋعا ارنالعان قۇرال-جابدىقتارمەن تانىستىردى.
ءىس-شارا بارىسىندا ەرەكشە ءبىلىم بەرۋ قاجەتتىلىكتەرى بار بالالاردى جالپى ءبىلىم بەرۋ كەڭىستىگىنە قوسۋ، ينكليۋزيۆتى جوبالىق ويلاۋ شارتتارى، جۇزەگە اسىرۋ كەزەڭدەرى مەن ادىستەرى، ەلىمىزدى ارنايى پەداگوگيكالىق كادرلارمەن قامتاماسىز ەتۋ؛ Big Data تەحنولوگيالارى جانە ولاردى ءبىلىم بەرۋ سالاسىندا قولدانۋ؛ سپورتتىق، شىعارماشىلىق جانە تاربيەلىك قولداۋ داعدىلارىن دامىتۋ ماسەلەلەرى تالقىلاندى.
سونداي-اق «ينكليۋزيۆتى ءبىلىم بەرۋدەگى نەيروپسيحولوگيالىق ادىستەر»، «ق ر ارنايى پەداگوگيكالىق كادرلارمەن قامتاماسىز ەتىلۋى»، «Big Data تەحنولوگيالارى جانە ولاردى ءبىلىم بەرۋ سالاسىندا قولدانۋ» تاقىرىپتارىندا ءدارىس-سۇحباتار، «ينكليۋزيۆتى ديزاين-ويلاۋ:ىسكە اسىرۋدىڭ كەزەڭدەرى مەن ادىستەرى»، «ەبب قاجەت ەتەتىن تۇلعالاردى جالپى ءبىلىم بەرۋ كەڭىستىگىنە قوسۋ شارتتارى» سەمينارى وتكىزىلدى.
بارلىق قاتىسۋشىلار اتاپ وتكەندەي، ءىس-شارا وتە جەمىستى ءوتتى، زەرتحانانىڭ اشىلۋى قازىرگى جانە بولاشاق ماماندار ءۇشىن پايدالى بولادى.