قىسقى كونكۋرس قورىتىندىسى بويىنشا ماگيستراتۋراعا ءبىلىم گرانتتارى يەگەرلەرىنىڭ ءتىزىمى جاريالاندى. مەملەكەتتىك گرانتتاردى 945 قازاقستاندىق جەڭىپ الدى، دەپ حابارلايدى اlmaty-akshamy.kz ق ر ءبىلىم جانە عىلىم مينيسترلىگىنە سىلتەمە جاساپ.
ونىڭ ىشىندە عىلىمي-پەداگوگيكالىق ماگيستراتۋراعا 837 ادام، بەيىندىك ماگيستراتۋراعا 108 ادام وقۋعا ءتۇستى. ۇمىتكەرلەردىڭ اراسىندا «ينجەنەرلىك، وڭدەۋ جانە قۇرىلىس سالالارى»، «جاراتىلىستانۋ عىلىمدارى، ماتەماتيكا جانە ستاتيستيكا»، «الەۋمەتتىك عىلىمدار، جۋرناليستيكا جانە اقپارات» سىندى باعىتتار سۇرانىسقا يە بولدى.
بيىل ءبىلىم جانە عىلىم ءمينيسترى اسحات ايماعامبەتوۆتىڭ تاپسىرماسى بويىنشا مينيسترلىك ماگيستراتۋرا مەن دوكتورانتۋراعا گرانتتار بەرۋ ءۇشىن كونكۋرستى ەكى رەت ءداستۇرلى تۇردە جازدا جانە العاش رەت قوسىمشا قىستا ۇيىمداستىردى. وسىلايشا، ءتۇرلى سەبەپتەرگە بايلانىستى ماگيستراتۋراعا تۇسە الماعان ۇمىتكەرلەر ءبىلىم بەرۋ گرانتتارىن تاعايىنداۋ كونكۋرسىنا قاتىسۋعا ەكىنشى مۇمكىندىك الدى.
«مەملەكەتتىك گرانتتار رەسپۋبليكالىق كونكۋرستىق كوميسسيا وتىرىسىنىڭ قورىتىندىسى بويىنشا بەرىلدى. ونىڭ قۇرامىنا مەملەكەتتىك ورگانداردىڭ، ۇكىمەتتىك ەمەس ۇيىمداردىڭ وكىلدەرى، جۋرناليستەر، قازاقستان ستۋدەنتتەر اليانسى مەن «وتانداستار» قورىنىڭ وكىلدەرى كىردى. وتىرىستا كوميسسيا بارلىق قاتىسۋشىنىڭ ناتيجەسىن قارادى. كونكۋرستىق ىرىكتەۋ ءراسىمى تولىعىمەن اۆتوماتتاندىرىلعان. ماگيستراتۋرادا وقۋ ءۇشىن ءبىلىم گرانتتارى ۇمىتكەرلەردىڭ بالىنا سايكەس كونكۋرستىق نەگىزدە بەرىلدى»، – دەپ اتاپ ءوتتى ق ر بعم جوعارى جانە جوعارى وقۋ ورنىنان كەيىنگى ءبىلىم دەپارتامەنتىنىڭ ديرەكتورى ادىلەت تويبايەۆ.
مەملەكەتتىك ماگيستراتۋرا ءبىلىم گرانتتارى يەگەرلەرىنىڭ ءتىزىمى مينيسترلىكتىڭ Telegram پاراقشاسىندا جانە ۇلتتىق تەستىلەۋ ورتالىعىنىڭ سايتىندا جاريالانعان.
بارلىق گرانت يەگەرلەرى 10 قاڭتارعا دەيىن قۇجاتتارىن ۋنيۆەرسيتەتتەردىڭ ۆيرتۋالدى قابىلداۋ كوميسسيالارى ارقىلى تاپسىرادى. وقۋ جوعارى وقۋ ورىندارىنىڭ اكادەميالىق كۇنتىزبەسىنە سايكەس باستالادى.
ايتا كەتەيىك، ىرىكتەۋ ساپاسىن جاقسارتۋ ءۇشىن اقىلى بولىمگە ماگيستراتۋراعا ءتۇسۋ ءۇشىن شەكتى بالل كوتەرىلدى. مەملەكەتتىك ءبىلىم بەرۋ تاپسىرىسى بويىنشا جانە اقىلى نەگىزدە عىلىمي-پەداگوگيكالىق ماگيستراتۋراعا ءتۇسۋ ءۇشىن شەكتى بالل – 75، بەيىندى ماگيستراتۋراعا ءتۇسۋ ءۇشىن 50 بالل.