قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ مەرەيتويلىق 90-شى ماۋسىمى كەڭ كولەمدە اتالىپ وتپەك. ۇلتتىق دومبىرا كۇنى مەن حالىق كومپوزيتورى قۇرمانعازى ساعىرباي ۇلىنىڭ 205 جىلدىعى قارساڭىندا وركەستر ءبىرقاتار اۋقىمدى قويىلىمدار جوسپارلاۋدا، دەپ حابارلايدى almaty-akshamy.kz
وركەستردىڭ رەپەرتۋارى تۋرالى وڭىرلىك كوممۋنيكاسيالار قىزمەتىنىڭ بريفينگىندە قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديرەكتورى مەدەت قۋانىشيەۆ پەن باس ديريجەر ابىلاي تىلەپبەرگەن ايتىپ بەردى.
«بيىلعى جىلدى ءبىز قۇرمانعازى ساعىرباي ۇلىنىڭ 205 جىلدىعىن مەرەكەلەۋدەن باستادىق. ۇلتتىق جانە الەمدىك كلاسسيكا تۋىندىلارى، سونداي-اق مۋزىكا شەبەرى، حالىق كومپوزيتورى قۇرمانعازىنىڭ ۇزدىك تۋىندىلارى ورىندالعان اۋقىمدى كونسەرت ۇيىمداستىرىلدى. ءاربىر ۇيىمداستىرىلعان ءىس-شارا قۇرمانعازى ساعىرباي ۇلىنىڭ 205 جىلدىعى مەن ۇلتتىق وركەستردىڭ 90 جىلدىعىن مەرەكەلەۋ اياسىندا وتۋدە»، - دەدى م.قۋانىشيەۆ.
وسى كونسەرتتىك ماۋسىمدى شىعارماشىلىق ۇجىم يتاليا قالالارى بويىنشا «كوشپەندىلەر اۋەنى» (كوشپەندىلەر اۋەنى) اتتى گاسترولدىك تۋر بارىسىندا اشقانىن اتاپ وتكەن ءجون.
«ءبىز 90-شى ماۋسىمدى ريمدەگى (يتاليا) حالىقارالىق گاسترولدىك كونسەرتىمىزبەن اشتىق. ريمنەن باسقا ءبىز نەاپول مەن فلورەنسيا قالالارىنا باردىق. جەرگىلىكتى كورەرمەندەر قازاق مۋزىكاسىنىڭ ەرەكشە دامىنە ءتانتى بولىپ، جىلى لەبىزدەرى مەن قۇتتىقتاۋلارىن ءبىلدىردى»، - دەپ تولىقتىردى سپيكەر.
ۇلتتىق دومبىرا كۇنىندە (بيىل 2 شىلدەدە اتاپ وتىلەدى) وركەستر رەسپۋبليكا استاناسىندا ۇيىمداستىرىلاتىن ءىس-شارالارعا قاتىسادى. وركەستر ۇجىمىنداعىلار ەكى مەرەيتويدى ەسكەرە وتىرىپ، ارنايى قويىلىمدار دايىندالاتىنىن اتاپ ءوتتى.
«بيىل دومبىرا كۇنىنە ارنالعان كونسەرتتىك باعدارلاما قۇرمانعازى اتىنداعى وركەستر مەن ن.تىلەندييەۆ اتىنداعى «وتىرار سازى» اكادەميالىق وركەسترىنىڭ قاتىسۋىمەن وتەدى. كورەرمەندەر ەلىمىزدە تانىمال ديريجەرلەردىڭ جەتەكشىلىگىمەن تانىمال ارتىستەردىڭ، سونىڭ ىشىندە ايتقالي جايىموۆ، ءدىنزۋحرا تىلەندييەۆا، رۋسلان بايمۋرزين جانە باسقالاردىڭ ونەرلەرىن تاماشالاي الادى. باعدارلامانىڭ باستى ەرەكشەلىكتەرنىنىڭ ءبىرى - سولاقاي دومبىراشىلاردىڭ ونەر كورسەتۋى بولادى، ويتكەنى ادەتتە بۇل اسپاپتا وڭ قولمەن وينايدى. سونداي - اق، حالىق ارتىستەرى سەكەن تۇرىسبەكوۆ، ەرلان رىسقالي جانە ايگۇل قوسانوۆا ونەر كورسەتەدى دەپ كۇتىلۋدە»، - دەدى وركەستردىڭ باس ديريجەرى ابىلاي تىلەپبەرگەن.
سونىمەن قاتار، شىعارماشىلىق ۇجىم العاشقى ۇلتتىق وركەستردىڭ تاريحىن باياندايتىن ءبىرقاتار بەينەماتەريالدار مەن كىتاپ شىعارۋعا نيەتتى.
«ءبىز وركەستردىڭ عاسىرلىق تاريحىن ءارتۇرلى بەينەماتەريالداردا، كىتاپ باسىلىمدارىندا ءتۇسىرىپ، وركەستردىڭ بۇگىنگى كۇنگە دەيىنگى دامۋ تاريحى جايلى ايتىپ بەرگىمىز كەلەدى. باستاۋىندا تۇرعان مۋزىكانتتارمەن، ديريجەرلەرمەن تانىستىرساق دەيمىز. قازىرگى ۋاقىتتا ءبىز مۇراعاتتىق ماتەريالدارمەن جۇمىس ىستەپ جاتىرمىز. كونسەرتتىك ومىردەن بوس ۋاقىتتى وسى جۇمىسقا ارنايمىز»، - دەدى ا. تىلەپبەرگەن.
قۇرمانعازى اتىنداعى قازاق ۇلتتىق حالىق اسپاپتار وركەسترىن 1934 جىلى اكادەميك احمەت جۇبانوۆ قۇردى. ۇجىمدا بۇگىندە 90-عا جۋىق مۋزىكانت بار، ولاردىڭ رەپەرتۋارىندا 4000 تۋىندى بار.