ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن ۇكىمەت وتىرىسىندا ءتۋريزمدى ودان ءارى دامىتۋ شارالارى تالقىلاندى.
تۋريزم جانە سپورت ءمينيسترى ەرمەك مارجىقپايەۆتىڭ ايتۋىنشا، ءبىرىنشى جارتىجىلدىقتىڭ قورىتىندىسى بويىنشا 3 ملن-نان استام قازاقستاندىق ەل ىشىندە ساياحات جاساعان – بۇل وتكەن جىلدىڭ سايكەس كەزەڭىندەگى كورسەتكىشتەن 400 مىڭعا ارتىق. جىل سوڭىنا دەيىن ىشكى تۋريستەر سانى 9 ملن ادامعا جەتەدى دەپ بولجانىپ وتىر. سونداي-اق شەتەلدىك تۋريستەردىڭ سانى ەكى ەسە وسكەن: 6 ايدىڭ قورىتىندىسى بويىنشا 500 مىڭنان استام ادام. جىل قورىتىندىسى بويىنشا بۇل كورسەتكىش 1،4 ملن تۋريستكە جەتەدى دەپ كۇتىلۋدە.
تۋريستەر سانىنىڭ وسۋىمەن تۋريزم سالاسىنداعى كاسىپكەرلەرىنىڭ تابىسى دا ارتتى. ءبىرىنشى جارتىجىلدىقتا ساياحاتشىلار مەن دەمالۋشىلاردى ورنالاستىرۋ ورىندارى 100 ملرد تەڭگەگە جۋىق تابىس تاپتى، بۇل وتكەن جىلدىڭ سايكەس كەزەڭىمەن سالىستىرعاندا 30 ملرد تەڭگەگە ارتىق.
سونىمەن قاتار بيىلعى 9 ايدا تۋريزم سالاسىنا 404،8 ملرد تەڭگە ينۆەستيسيا تارتىلدى – كورسەتكىش 44%-عا ءوستى. وڭىرلەر بويىنشا سولتۇستىك قازاقستان، پاۆلودار، اقتوبە جانە الماتى وبلىستارى كوش باستاپ تۇر.
مينيستر 2022 جىلدان باستاپ قازاقستاندا وسى سالاداعى كاسىپكەرلەردىڭ بەلسەندىلىگىن ىنتالاندىرۋعا باعىتتالعان جاڭا مەملەكەتتىك قولداۋ شارالارى ەنگىزىلگەنىن ايتتى. جالپى 2023 جىلدىڭ باسىنان باستاپ بارلىق مەملەكەتتىك قولداۋ شاراسى بويىنشا وڭ ديناميكا بايقالادى. بۇگىنگى تاڭدا جالپى 600 ملن تەڭگەدەن استام سوماعا ءوتىنىم ماقۇلداندى.
سونىمەن قاتار تۋريستىك ينفراقۇرىلىمدى دامىتۋ، «Kids go free» باعدارلاماسىن كەڭەيتۋ، رەسپۋبليكانىڭ تۋريستىك ءيميدجىن حالىقارالىق دەڭگەيدە ىلگەرىلەتۋ، سالانى سيفرلاندىرۋ جانە ت.ب. بويىنشا جۇمىستار جالعاسۋدا.
الماتى وبلىسىندا تاۋ شاڭعىسى جانە ەكوتۋريزمدى دامىتۋ، اباي وبلىسىنىڭ تاريحي-مادەني مۇراسىن تانىتۋ جانە پاۆلودار وبلىسىنىڭ باياناۋىل كۋرورتتىق ايماعىنا تۋريستەردى تارتۋ تۋرالى وڭىرلەر اكىمدەرى مارات سۇلتانعازييەۆ، نۇرلان ۇرانحايەۆ جانە اسايىن بايحانوۆ بايانداما جاسادى.
سونداي-اق وتىرىستا تۋريستىك بيزنەس وكىلى الەكساندر گۋجاۆين ءسوز سويلەدى.
ءاليحان سمايىلوۆ ۇكىمەت مەملەكەت باسشىسىنىڭ تاپسىرمالارىنا سايكەس ەكونوميكانى ءارتاراپتاندىرۋ ماسەلەسىندە ەلدىڭ تۋريستىك الەۋەتىن دامىتۋعا بارىنشا كوڭىل ءبولۋى ءتيىس ەكەنىن اتاپ ءوتتى.
«بىزگە تۋريزم سالاسىندا جاڭا سەرپىندى جوبالار قاجەت. سوڭعى 3 جىلدا سالاعا $4 ملرد كولەمىندە ينۆەستيسيا تارتىلدى. 400-دەن استام نىسان سالىنىپ، 7 مىڭعا جۋىق تۇراقتى جۇمىس ورنى قۇرىلدى»، — دەدى ول.
پرەمەر-مينيستر قازاقستاندا 20-دان استام تانىمال حالىقارالىق دەڭگەيدەگى قوناق ۇيلەر اشىلعانىن، مۇنىڭ ءوزى شەتەلدىك تۋريستەردى تارتۋعا ايتارلىقتاي ىقپال ەتەتىنىن اتاپ ءوتتى. سونىمەن قاتار تەك سوڭعى 3 جىلدىڭ وزىندە ۇلتتىق ساياباقتاردا ەكوتۋريستەردىڭ ۇزدىكسىز ءوسىپ كەلەدى.
«وتكەن جىلدان بەرى تۋريزم نىساندارىن سالۋ، تاۋ شاڭعىسى كۋرورتتارىن دامىتۋ جانە تۋريستىك اۆتوبۋستار ساتىپ الۋ جونىندەگى جوبالار مەملەكەتتىك قولداۋ شارالارىمەن قامتىلدى. ەل ىشىندە ساياحاتتايتىن قازاقستان ازاماتتارى ءۇشىن بالالار اۆيابيلەتتەرى سۋبسيديالانادى. تۋروپەراتورلارعا شەتەلدىك تۋريستەردى تارتقانى ءۇشىن سۋبسيديالار بەرىلەدى»، — دەدى ءاليحان سمايىلوۆ.
جالپى 80 ەلدىڭ ازاماتى قازاقستاندا ۆيزاسىز ءجۇرىپ-تۇرا الادى. 109 مەملەكەتتەن كەلەتىن شەتەلدىكتەر ءۇشىن ەلەكتروندىق ۆيزا الۋ مۇمكىندىگى بار. حالىقارالىق اۋە قاتىناسىنىڭ گەوگرافياسى دا كەڭەيىپ كەلەدى.
«بۇگىنگى تاڭدا قازاقستاندا باسىم تۋريستىك اۋماقتار ايقىندالدى. وندا “زاكىرلىك” جوبالار ىسكە اسىرىلاتىن بولادى. بۇدان بولەك، ەلىمىزدەگى تۋريستىك سالانىڭ ۇلكەن الەۋەتىن ەسكەرە وتىرىپ، اتالعان جۇمىسقا ءاربىر ءوڭىر تارتىلۋى ءتيىس دەپ سانايمىن»، — دەپ اتاپ ءوتتى پرەمەر-مينيستر.
ونىڭ ايتۋىنشا، بۇل رەتتە، تۋريستىك نىسانداردى جىل بويى پايدالانۋ تۇجىرىمداماسىن كەڭەيتۋ جانە قۇرۋ قاجەت. ۇكىمەت باسشىسى جۇمىستى جۇيەلى دەڭگەيدە قۇرۋ ماڭىزدى ەكەنىن اتاپ ءوتتى. ناتيجەسىندە بۇل دۇنيەجۇزىلىك ەكونوميكالىق فورۋمنىڭ ساياحات پەن ءتۋريزمدى دامىتۋدىڭ جاھاندىق يندەكسىندە قازاقستاننىڭ رەيتينگىن ارتتىرۋعا مۇمكىندىك بەرەدى.