ۇكىمەت وتىرىسىندا قازاقستاننىڭ بيىلعى قاڭتار-قىركۇيەك ايلارىنداعى الەۋمەتتىك-ەكونوميكالىق دامۋ جانە رەسپۋبليكالىق بيۋدجەتتىڭ اتقارىلۋ قورىتىندىلارى قارالدى.
ۇلتتىق ەكونوميكا ءمينيسترى الىبەك قۋانتىروۆ ەسەپتى كەزەڭدە ەل ەكونوميكاسىنىڭ ءوسۋ قارقىنى 4،7% بولعانىن باياندادى. ناقتى سەكتورداعى وڭ ديناميكا 3،7%، قىزمەت كورسەتۋ سالاسىندا 5،1%-دى قۇرادى. ءوسۋ قارقىنى جوعارى سالالار: قۇرىلىس – 12،6%، ساۋدا – 10%، سونداي-اق اقپارات پەن بايلانىس – 8،4%، دەپ حابارلايدى Almaty-akshamy.kz Primeminister.kz-كە سىلتەمە جاساپ.
نەگىزگى كاپيتالعا سالىنعان ينۆەستيسيالاردىڭ ءوسۋ قارقىنى 12،1% بولدى. ينۆەستيسيالار اعىنى ارتقان سالالار: كولىك جانە قويما – 59،4%، ساۋدا – 37،5%، ءبىلىم – 23،7%، اۋىل شارۋاشىلىعى – 12،9%، ونەركاسىپ – 8،2%، ونىڭ ىشىندە تاۋ-كەن ونەركاسىبى – 4،3%.
قاڭتار-تامىزدا رەسپۋبليكانىڭ سىرتقى ساۋدا اينالىمى 4،2%-عا ءوسىپ، $91،1 ملرد-تى قۇرادى. ەكسپورت $51،2 ملرد-قا جەتتى، ونىڭ ىشىندە وڭدەلگەن تاۋارلار – $16،2 ملرد، يمپورت – $39،8 ملرد. جالپى قازاقستاننىڭ وڭ ساۋدا بالانسى $11،4 ملرد-قا تەڭ.
پرەمەر-مينيستردىڭ ورىنباسارى – قارجى ءمينيسترى ەرۇلان جاماۋبايەۆ 9 ايدىڭ قورىتىندىسى بويىنشا مەملەكەتتىك بيۋدجەتكە 13،8 ترلن تەڭگە كىرىس تۇسكەنىن، جوسپار 97%-عا ورىندالعانىن مالىمدەدى. رەسپۋبليكالىق بيۋدجەت 9،2 ترلن تەڭگەگە، جەرگىلىكتى بيۋدجەتتەر 4،7 ترلن تەڭگەگە تولىقتى. سول كەزەڭدە مەملەكەتتىك بيۋدجەتتىڭ شىعىستارى 99،3%-عا، رەسپۋبليكالىق بيۋدجەتتىڭ شىعىستارى 98،6%-عا، جەرگىلىكتى بيۋدجەتتەردىڭ شىعىستارى 99،5%-عا ورىندالدى.
ۇكىمەت باسشىسىنىڭ ايتۋىنشا، 9 ايدىڭ قورىتىندىسى بويىنشا اباي، باتىس قازاقستان، قىزىلوردا وبلىستارى مەن الماتى جانە شىمكەنت قالالارىندا بارلىق نەگىزگى كورسەتكىشتىڭ ءوسۋى تىركەلدى. قابىلدانعان شارالاردىڭ ناتيجەسىندە ينفلياسيا دەڭگەيى 11،8%-عا دەيىن تومەندەدى.
«جىلدىڭ سوڭىنا دەيىن 2،5 اي قالدى. ەكونوميكانىڭ بارلىق سالاسىندا ءوسۋ قارقىنىن ارتتىرۋ ءۇشىن ناقتى شارالار قابىلداۋ كەرەك»، — پرەمەر-مينيستر.
سونىمەن قاتار جاۋاپتى مەملەكەتتىك ورگاندار مەن اكىمدىكتەرگە ازىق-تۇلىك تاۋارلارىنىڭ باعاسىن تۇراقتاندىرۋ جانە وتاندىق ازىق-تۇلىك ءوندىرىسىن ىنتالاندىرۋ بويىنشا جۇمىستى جالعاستىرۋ تاپسىرىلدى.
«شەتەلدىك جانە وتاندىق ينۆەستورلاردى تارتا وتىرىپ، شيكىزاتتىق ەمەس سەكتورلاردا، ونىڭ ىشىندە وڭدەۋ ونەركاسىبى، اۋىل شارۋاشىلىعى، كولىك، لوگيستيكا، IT، تۋريزم جانە باسقا سالالاردا ينۆەستيسيالىق جوبالاردى ىسكە اسىرۋدى جەدەلدەتۋگە باسا كوڭىل ءبولۋ كەرەك»، — دەدى ءاليحان سمايىلوۆ.
قورىتىندىلاي كەلە، ۇكىمەت باسشىسى سونداي-اق شاعىن جانە ورتا بيزنەستى دامىتۋ ءۇشىن قولايلى جاعداي جاساۋ، كاسىپكەرلىك باستامالاردى قولداۋ، جاڭا جۇمىس ورىندارىن قۇرۋدى ىنتالاندىرۋ بويىنشا ءتيىستى شارالاردى ودان ءارى جالعاستىرۋ قاجەتتىگىن ايتتى.