وسى جىلدىڭ باسىنان بەرى 8 476 ازاماتقا زياندى ەڭبەك جاعدايلارىندا ۇزاق ۋاقىت جۇمىس ىستەگەن ادامدارعا بەرىلەتىن ارناۋلى الەۋمەتتىك تولەم تاعايىندالدى.
اتالعان تولەمدى تاعايىنداۋعا بارلىعى 9 255 ادام ءوتىنىش بىلدىرگەن، دەپ حابارلايدى Almaty-akshamy.kz cالا مينيسترلىگىن سىلتەمە جاساپ.
ەكى كوزدەن تولەنەتىن ارناۋلى الەۋمەتتىك تولەمگە (رەسپۋبليكالىق بيۋدجەت جانە ءبىرىڭعاي جيناقتاۋشى زەينەتاقى قورى) 2 840 ادام جۇگىندى، ونىڭ ىشىندە 2 730 ادامعا تاعايىندالدى.
ءتورت قارجىلاندىرۋ كوزىنەن بەرىلەتىن ءاات (رەسپۋبليكالىق بيۋدجەت، ءبىرىڭعاي جيناقتاۋشى زەينەتاقى قورى، جۇمىس بەرۋشى جانە ءومىردى ساقتاندىرۋ ۇيىمى) تاعايىنداۋعا 6 415 ادام ءوتىنىش ءبىلدىرىپ، ونىڭ 5 746-سىنا تاعايىندالعان.
سونداي-اق، 369 ازامات ساقتاندىرۋ كومپانياسىمەن زەينەتكەرلىك اننۋيتەت شارتىنىڭ جاسالۋىن كۇتۋدە، 68 ازامات سمس حابارلاماعا جاۋاپ بەرمەگەن. مىندەتتى شارتتاردى ورىنداماعاندىقتان، 342 ءوتىنىش بەرۋشىگە ءاات تاعايىنداۋدان باس تارتىلدى.
اۋماقتار بويىنشا ارناۋلى الەۋمەتتىك تولەمدەردى الۋعا ءوتىنىش بىلدىرگەندەردىڭ ەڭ كوپ سانى قاراعاندى (2 كوزدەن – 492 ادام، 4 كوزدەن – 1 166 ادام)، قوستاناي (2 كوزدەن – 318 ادام، ال 4 كوزدەن – 876 ادام) جانە شىعىس قازاقستان (2 كوزدەن – 248 ادام، ال 4 كوزدەن – 882 ادام) وبلىستارىندا تىركەلگەن.
بۇرىن حابارلانعانداي 2024 جىلدىڭ 1 قاڭتارىنان باستاپ قازاقستاندا زياندى ەڭبەك جاعدايلارىندا ۇزاق ۋاقىت جۇمىس ىستەگەن ادامدارعا ارناۋلى الەۋمەتتىك تولەم ەنگىزىلدى.
ارناۋلى الەۋمەتتىك تولەم تاعايىنداۋ ءۇشىن 55 جاسقا تولۋ جانە ءبىرىڭعاي جيناقتاۋشى زەينەتاقى قورىندا (بۇدان ءارى – بجزق) كەمىندە 7 جىل كاسىپتىك زەينەتاقى اۋدارىمدارىنىڭ بولۋى مىندەتتى شارتتار بولىپ تابىلادى. تولەم زەينەتكەرلىك جاسقا دەيىن تولەنەدى. ارناۋلى الەۋمەتتىك تولەمدەردى الۋ ءۇشىن ەڭبەك جاعدايلارى زياندى جۇمىستارمەن اينالىسپاۋعا ءتيىس. جۇمىسكەرلەر جەڭىل جۇمىسقا اۋىسا الادى، سودان كەيىن ولار جالاقى مەن تولەم الادى نەمەسە دەمالىسقا شىعىپ، زەينەتكە شىققانعا دەيىن ارناۋلى الەۋمەتتىك تولەم الادى.
بجزق دەرەكتەرى بويىنشا ارناۋلى الەۋمەتتىك تولەمدى تاعايىنداۋ ءۇشىن مىندەتتى شارتتاردى ەسكەرە وتىرىپ، وعان 2024 جىلى 37 مىڭنان استام جۇمىسكەر ۇمىتكەر بولا الادى، جالپى تولەمنىڭ ورتاشا مولشەرى 208 مىڭ تەڭگەدەن اسادى. ءاربىر جۇمىسكەر ءۇشىن تولەم مولشەرى بجزق-داعى جيناقتارىنا بايلانىستى بولادى.