8 ناۋرىزعا دەيىن ەكى-ۇش كۇن بار. دەگەنمەن اپتا بويى قىزدار قاۋىمى ءۇشىن مەرەكەنى اتاپ ءوتۋ، سىيلىقتار الۋ ناۋقانى باستالىپ كەتتى
گۇل، ءاتىر، شوكولاد، اشەكەي، باعالى زات. وسى تىزىمنەن باسقا نازىك جاندىلار قاۋىمىنا نە سىيلارىڭىزدى بىلمەي جۇرگەن بولساڭىز، وندا سىيلىق ىزدەگەن ادامعا پايدالى بولار كەڭەس ۇسىنامىز،
Elorda.info سايتى ۇسىنۋعا بولاتىن بىرنەشە سىيلىق نۇسقالارىن ۇسىنىپتى.
اۋا ىلعالداندىرعىش
ۇيگە ارنالعان ساپالى اۋا ىلعالداندىرعىش – ادامنىڭ تەرىسى مەن وكپەسى ءۇشىن ەڭ پايدالى گادجەتتەردىڭ ءبىرى. بۇل، اسىرەسە، جىلدىڭ سۋىق مەزگىلىندە اسا قاجەت: قۇرىلعى اۋانىڭ ىلعالدىق دەڭگەيىن 30-50% ارالىقتا ۇستاپ تۇرۋعا كومەكتەسەدى. ىلعالداندىرعىش ساتىپ الاردا ونىڭ قانشالىقتى اۋداندى ىلعالداندىرۋعا كۇشى جەتەتىنىن ەسكەرىڭىز: وكىنىشكە قاراي، شاعىن اۋا ىلعالداندىرعىشتار ۇلكەن اۋماقتاعى اۋانىڭ ىلعالدىق دەڭگەيىن جوعارىلاتا المايدى.
مەديسينالىق چەك-اپ سەرتيفيكاتى
ساپالى كلينيكالارداعى چەك-اپ ارزان تۇرمايدى، ءبىراق ونىڭ ادام بويىنداعى قانشاما اۋرۋدىڭ الدىن الىپ، دارۋمەندەر دەفيسيتىن انىقتايتىنىن ەسكەرسەك، كەز كەلگەن قىز-كەلىنشەككە بۇدان اسقان پايدالى سىيلىق جوق. قازىرگى تاڭدا جاتىر موينى ىسىگى مەن ومىراۋ قاتەرلى ىسىگى – الەم بويىنشا (ونىڭ ىشىندە قازاقستاندا دا) ەڭ ءجيى كەزدەسەتىن ءارى جوعارى قارقىنمەن ءورشىپ بارا جاتقان ونكولوگيالىق اۋرۋ. جاقىنىڭىزدى وسى سۇمدىق دياگنوزداردان قورعاعىڭىز كەلسە، چەك-اپ سەرتيفيكاتى – ناعىز ءسىز ىزدەگەن سىيلىق.
شاڭسورعىش-روبوت
ءۇي تازالاۋ – كوبىنە ايەلدەردىڭ يىعىنا تۇسەتىن اقى تولەنبەيتىن جۇمىس. ءۇي ىشىندە ءوز بەتىنشە جىلجىپ، جولىنداعى شاڭ-توزاڭدى جيناپ جۇرەتىن شاڭسورعىش-روبوت – كەز كەلگەن قىز-كەلىنشەكتىڭ ۋايىمىن ازايتاتىن شىنىمەن دە پايدالى گادجەت. ارينە، ول ارزان تۇرمايدى، ءبىراق سونىڭ كومەگىمەن قانشاما ۋاقىتتى ۇنەمدەۋگە بولاتىنىن ويلاڭىزشى. ايتپاقشى، مۇنداي قۇرىلعىلاردى، اسىرەسە، مىسىعى بار حانىمدار ءسوزسىز ۇناتادى.
سپا-سالونعا سەرتيفيكات
كەيدە تاۋاردان گورى پايدالى قىزمەت ءتۇرىن دە سىيلاۋعا بولادى. كۇنى بويى كومپيۋتەردىڭ الدىندا وتىراتىن قىز-كەلىنشەكتەردىڭ ارقاسىنا تۇز جينالىپ، قيمىل-قوزعالىسقا ىڭعايسىزدىق تۋعىزاتىنى بەلگىلى. سوندايدا 2-3 ساعاتتىق سپا-باعدارلامالار ونىڭ بويىن بالبىراتىپ، ءوزىن-وزى جەڭىل سەزىنۋىنە كوپ كومەكتەسەدى. سونداي-اق مۇنداي سىيلىق – ەرتەلى-كەش بالا كۇتىمىمەن ۇيدە وتىرعان كەلىنشەكتەر ءۇشىن دە تاپتىرماس تارتۋ.
كونسەرتكە بيلەت
سۇيىكتى ءانشىسىنىڭ كونسەرتىنە نەمەسە ادەمى مەرەكەلىك كەشكە بيلەت اپەرسەڭىز دە، ونى كول-كوسىر قۋانىشقا كەنەلتەسىز. «ەڭ جاقسى سىيلىق – اسەر» دەگەن ءسوز بار. جاندى داۋىستى كونسەرتتەن العان اسەرى ونىڭ ەسىندە ۇزاق جىلدار بويى ساقتالارى داۋسىز. ونىڭ ۇستىنە، 8 ناۋرىزعا قاراي كونسەرتتەر لەگى دە ارتادى.
بيۋتي-دۇكەن سەرتيفيكاتى
تەرى كۇتىمىنە ارنالعان قۇرالداردى پايدالانبايتىن قىز-كەلىنشەك جوق. ال ساپالى كۇتىم قۇرالدارىنىڭ باعاسى شارىقتاپ تۇرعانىن ەسكەرسەك، مۇنداي سەرتيفيكات كوپ ارۋدىڭ كوڭىلىنەن شىعارى انىق. الايدا بۇل تۇستا مىنانى ەسكەرۋىڭىزدى سۇرايمىز: ەگەر ءسىز قىزىڭىزدىڭ/جۇبايىڭىزدىڭ/اپا-قارىنداسىڭىزدىڭ ناقتى قانداي برەند ونىمدەرىن تۇراقتى قولداناتىنىنا كوزىڭىز جەتسە عانا سول دۇكەننىڭ سەرتيفيكاتىن سىيلاۋعا بولادى.
سىمسىز قۇلاققاپ
قازىرگى تاڭدا سىمسىز قۇلاققاپتار قانشالىقتى قاجەتتى ءارى پايدالى دۇنيە ەكەنىن سىمسىز قۇلاققابى بارلار عانا تولىقتاي تۇسىنەدى. سىمسىز قۇلاققاپ ارقىلى ءارتۇرلى شارۋامەن (مەيلى سپورتپەن) اينالىسىپ جاتىپ-اق مۋزىكا، پودكاست تىڭداۋعا، قوڭىراۋعا جاۋاپ بەرۋگە بولادى. قۇلاق پەن گادجەتتىڭ ورتاسىن جالعاپ تۇراتىن سىمنىڭ جوقتىعى ءسىزدىڭ قيمىل-قوزعالىسىڭىزعا كادىمگىدەي ەركىندىك بەرەدى.
بوس ۋاقىت
ءيا-يا، ءبىز قاتەلەسپەدىك. بوس ۋاقىت تا – كەيدە ايەلدەر ەڭ قاتتى قالايتىن دۇنيە. ەگەر جۇبايىڭىز نەمەسە اپا/قارىنداسىڭىز ەرتەلى-كەش كىشكەنتاي بالالارىمەن ۇيدە وتىرسا، جانىنا بارىڭىز دا، گۇلىڭىزدى ۇسىنىپ تۇرىپ: «مەن بالالاردى ءۇش-تورت ساعاتقا الىپ قالايىن، سەن سىرتقا شىعىپ، قىدىرىپ كەلە عوي» دەڭىز. قالتاسىنا 15-20 مىڭ تەڭگە سالىپ جىبەرسەڭىز تىپتەن تاماشا! شوپينگ جاساي ما، قۇربىلارىمەن ءدامحاناعا بارىپ، اڭگىمە-دۇكەن قۇرىپ قايتا ما، ايتەۋىر، الگى ۋاقىتتى بارىنشا وزىنە ارناسىن. ۇيگە ورالعاندا، ونىڭ بال-بۇل جانعان ءجۇزى مەن العىسقا تولى كوزى ءسىزدىڭ سىيلىعىڭىزدىڭ قانشالىقتى پايدالى بولعانىن بىلدىرسە كەرەك.