نۇرلان ءنىعماتۋليننىڭ ۇلىنا قىلمىستىق ءىس قوزعالدى
نۇرجان نۇرلانوۆ، بۇرىنعى ءماجىلىس ءتوراعاسى نۇرلان ءنىعماتۋليننىڭ ۇلى، قازاقستانداعى ەليتانىڭ جارقىن وكىلى رەتىندە تانىمال. ول كەزىندە «بايتەرەك» حولدينگى مەن «قازمۇنايگاز-اەرو» ءجشس-نىڭ باسشىلىق قىزمەتتەرىن اتقارعان. بۇرىن 70 ميلليون دوللارلىق جەكە ۇشاعىمەن ءجيى كوزگە تۇسكەن نۇرجان ءقازىر مۇلدەم باسقا سەبەپپەن قوعام نازارىندا. بۇل تۋرالى Aqshamnews.kz سايتى حابارلايدى.
ءقازىر وعان ق ر قىلمىستىق كودەكسىنىڭ 389-بابى («وزىنشە بيلىك ەتۋ») بويىنشا ايىپ تاعىلىپ، تەرگەۋ جۇرگىزىلۋدە. الماتى قالاسى پوليسيا دەپارتامەنتىنىڭ تەرگەۋ باسقارماسى بۇل ءىستى قاراپ جاتىر. ىشكى ىستەر مينيسترلىگىنىڭ مالىمەتىنشە، تەرگەۋ اياسىندا بارلىق قاجەتتى شارالار اتقارىلىپ جاتىر، الايدا ءىستىڭ تولىق ءمان-جايى ازىرگە جاريالانبايدى.
نۇرجان نۇرلانوۆ – تەرگەۋگە ىلىككەن جالعىز نىعماتۋلين ەمەس. بۇعان دەيىن ارعىن نىعماتۋلينگە (نۇرلان ءنىعماتۋليننىڭ تۋىسى) «سارىارقا» حوككەي كلۋبىنا بولىنگەن بيۋدجەت قاراجاتىن جىمقىردى دەگەن ايىپ تاعىلىپ، وعان ىزدەۋ جاريالانعان ەدى.
ودان بولەك، نۇرلان ءنىعماتۋليننىڭ ءىنىسى ەرلان نىعماتۋلين دە تەرگەۋگە الىنعان. ول «قازاقمىس» كومپانياسىنا قاتىسى بار كاسىپكەرلەردەن مۇلكىن تارتىپ الۋعا تىرىستى» دەگەن كۇدىككە ءىلىنىپ وتىر. ەرلان نىعماتۋلين كەزىندە پارلامەنتتىڭ ەكى پالاتاسىندا دا دەپۋتات بولعان جانە Forbes Kazakhstan نۇسقاسى بويىنشا ەلدىڭ ەڭ ىقپالدى بيزنەسمەندەرىنىڭ ءبىرى رەتىندە تانىلعان.
بۇرىن 70 ميلليون دوللار تۇراتىن Gulfstream G650 جەكە ۇشاعىمەن ساياحاتتاعان، ءساندى ءومىر سالتىمەن تانىمال نۇرجان نۇرلانوۆ ءقازىر مۇلدە باسقا جاعدايدا قالىپ وتىر. بۇعان دەيىن قازاقستانداعى ەليتانىڭ بەدەلدى وكىلدەرىنىڭ ءبىرى رەتىندە جۇرگەن ول زاڭ الدىندا جاۋاپ بەرۋگە ءماجبۇر بولۋى مۇمكىن.
بۇل جاعداي قوعامدا «ەليتانىڭ جاۋاپكەرشىلىگى»، «قۇقىق قورعاۋ جۇيەسىنىڭ تاۋەلسىزدىگى»، «ساياسي ىقپالدىڭ السىرەۋى» سىندى ماسەلەلەردى قايتا قوزعاۋدا. ساراپشىلاردىڭ پىكىرىنشە، مۇنداي ىستەردىڭ جيىلەپ كەتۋى – ەلدەگى ساياسي-ەكونوميكالىق جاعدايدىڭ وزگەرىپ جاتقانىن كورسەتەدى.