سافينا نامۋكۆايا ەكو ادىسىمەن جۇكتى بولىپ، ومىرگە ەگىز بالانى امان-ەسەن اكەلگەن.
ۋگاندالىق قىز بەن ۇلدىڭ اناسى اتانعان ايەلگە كەسار تىلىگى جاسالعان، دەپ حابارلايدى Almaty-akshamy.kz.
BBC News جازۋىنشا، سافينانىڭ ءوزى بالالاردىڭ دۇنيەگە كەلۋىن كەرەمەت دەپ اتادى. زەينەتكەر انا ءوزىن جاقسى سەزىنەدى. كامپالا قالالىق اۋرۋحاناسى 70 جاستاعى انانىڭ ەگىزدەردى ومىرگە اكەلۋىن تەك مەديسينالىق جەتىستىك قانا دەپ سانامايدى.
«بۇل ادام رۋحىنىڭ كۇشى مەن توزىمدىلىگى تۋرالى اڭگىمە»، - دەپ اتاپ ءوتتى دارىگەرلەر.
نامۋكۆايا افريكانىڭ ەڭ قارت اناسى اتاندى. ول بالالاردى جالعىز ءوزى تاربيەلەمەك. ويتكەنى سافينا ەگىز كۇتەدى دەگەن جاڭالىقتى ەستىگەن بويدا، بالارادىڭ اكەسى اجىراسىپ كەتكەن.
«ەر ادامدار بىرنەشە بالانىڭ ومىرگە كەلەتىنىن ۇناتپايدى. مەنى وسىندا قابىلداعاننان بەرى ول ەشقاشان كەلگەن ەمەس»، - دەدى ايەل.
بۇل نامۋكۆايانىڭ سوڭعى ءۇش جىلدا ەكىنشى رەت بوسانۋى. 2020 جىلى ول قىز تۋدى. سافينا تۇڭعىشى دۇنيەگە كەلگەنگە دەيىن ادامدار ونىڭ بالالارىنىڭ جوقتىعىنان مازاق ەتكەنىن ايتتى.
«مەن باسقا ادامداردىڭ بالالارىن باقتىم، ولار ەرجەتىپ، مەنى جالعىز قالدىردى. مەن قارتايعان كەزدە ماعان قامقورلىق جاسايتىن ەشكىم بولمايدى دەپ ويلادىم»، - دەپ ءتۇسىندىردى ول ۇرپاق اكەلگىسى كەلەتىندىگىن.
اقپاراتقا سايكەس، نامۋكۆايا بالالارىن دۇنيەگە اكەلۋ ءۇشىن دونورلىق ۇرىقتى نەمەسە بۇرىن مۇزداتىلعان ۇرىقتى پايدالانعانى بەلگىسىز. سونداي-اق، سافينا مەنوپاۋزادان وتكەن، وتپەگەنى دە بەلگىسىز. ول ادەتتە 45 پەن 55 جاس ارالىعىنداعى ايەلدەردە كەزدەسەدى.
ءبىر قىزىعى، نامۋكۆايا الەمدەگى ەڭ قارت انا ەمەس. 2019 جىلى ءۇندىستاندا ەگىز قىزداردى مانگايامما ياراماتي ەسىمدى 73 جاستاعى ايەل دۇنيەگە اكەلدى. ولدا بالالارعا ەكو ارقىلى جۇكتى بولعان.