بيىلدان باستاپ ەلدە وڭىرلىك IT-حابتاردى دامىتۋعا باسىمدىق بەرەمىز.
بۇل ارقىلى اقپاراتتىق تەحنولوگيا ماماندارىن تانىپ، قولداۋدى كوزدەپ وتىر ۇكىمەت، دەپ حابارلايدى اlmaty-akshamy.kz.
ءقازىر ءتۇرلى ونلاين پلاتفورمالار ىسكە قوسىلىپ جاتىر. بۇل دا IT مامانداردىڭ ءبىلىمى مەن بىلىكتىلىگىن ارتتىرۋعا سەپ.
قازىرگى 14 وڭىرلىك حابتىڭ قاتارى تاعى جەتەۋمەن تولىعادى. مۇنىڭ ماڭىزى زور. سەبەبى الەمدىك IT سالا بىلىكتى ماماندار مەن ستارتاپ يدەيالارعا مۇقتاج.
امەريكالىق SKILLSOFT كومپانياسى IT سالاسىنداعى بىلىكتىلىك بويىنشا زەرتتەۋىن اياقتادى. ساۋالناماعا بۇكىل الەمنەن 5000-عا تارتا مامان قاتىسقان. ولاردىڭ قاتارىندا سولتۇستىك جانە لاتىن امەريكاسى، ازيا-تىنىق مۇحيتى ەلدەرى، ەۋروپا، تاياۋ شىعىس جانە افريكا وكىلدەرى بار.
ساراپشىلار IT سالاسىنىڭ بولاشاعىنا الاڭداپ وتىر. ويتكەنى مامان جوق. زەرتتەۋگە قاتىسقان جەتەكشىلەردىڭ جارتىسىنان كوبى «الداعى 1-2 جىلدا بۇل انىق بايقالادى» دەيدى.
ونىڭ ۇستىنە تەحنولوگيا جىلدام دامىپ جاتىر. وسى ورايدا رەسپوندەنتتەردىڭ 43%ء-ى قىزمەتكەرلەرىندە بۇل اعىسقا ىلەسەتىندەي قاۋقارى از ەكەنىن مويىنداعان.
«اسىرەسە جاساندى ينتەللەكت جانە ماشينالى وقىتۋدا كەمشىلىك كوپ. ءبىز بولاشاق جۇمىسشىلارىمىزدان بىلىمنەن گورى، تاجىريبە تالاپ ەتەمىز. ءتىپتى ول جايلى جاقسى ۇسىنىمدار بولسا، قۇپتايمىز. ءوزىمىز دە ماماندارىمىزدىڭ بىلىكتىلىگىن ارتتىرىپ وتىرۋعا كوڭىل بولەمىز. قايتا وقىتۋدان وتكىزۋىمىز مۇمكىن. ءقازىردىڭ وزىندە كوبى تەگىن پلاتفورمالاردان ونلاين ءبىلىم الىپ ءجۇر»، - زەرتتەۋگە قاتىسقان، IT كومپانيا باسشىلارى.
اقپاراتتىق تەحنولوگيا سالاسىن دامىتۋ ءبىزدىڭ ەل ءۇشىن دە ماڭىزدى باعىت سانالادى. مەملەكەت باسشىسى 2025 جىلعا قاراي 100 مىڭ IT مامانىن دايىنداۋدى تاپسىرعان ەدى. ءقازىر Astana Hub بازاسىندا Tech Orda باعدارلاماسى جۇزەگە اسىپ جاتىر. 18-45 جاس ارالىعىنداعى ازاماتتار تەگىن ءبىلىم الادى.
وڭىرلىك IT-حابتار دا بەلسەندى جۇمىس ىستەپ جاتىر. ايدا دۋسوۆا، Astana Hub وڭىرلىك دامىتۋ ءوفيسىنىڭ ديرەكتورى: - قازىرگى ۋاقىتتا Astana Hub ەلىمىزدەگى 14 وڭىرلىك IT-حابقا جەتەكشىلىك ەتەدى. ءبىز سونىمەن قاتار بۇل ءىت-حابتاردى سيفرلىق ينفراقۇرىلىم – astanahub.com پلاتفورماسىن پايدالانا وتىرىپ، دامىتۋدى قولعا الدىق. 2023 جىلى ايماقتاردا اكت سالاسىندا 784 ءىس-شارا ۇيىمداستىرىلىپ، 24 702 ادام قاتىستى، سونداي-اق 194 ستارتاپ-يدەيا ۇسىنىلىپ، 7 اۋقىمدى فورۋم وتكىزىلدى. ناتيجەسىندە بىلتىر وڭىرلەردەن 100-دەن استام كومپانيا Astana Hub قاتىسۋشى رەتىندە تىركەلىپ، قازىرگى تاڭدا ەلىمىزدىڭ IT سەكتورىنىڭ دامۋىنا بەلسەندى ۇلەس قوسىپ جاتىر. بيىل تاعى 7 قالادا IT-حاب اشۋدى جوسپارلاپ وتىرمىز.
جالپى قارقىن جامان ەمەس. ەلدە IT سالاسىنداعى قىزمەتتەرگە سۇرانىس ارتىپ كەلەدى. بىلتىرعى ءوسىم 43%-كە جەتكەن. كورسەتىلگەن قىزمەتتەردىڭ دەنى كونسۋلتاسيالىق جانە پراكتيكالىق قىزمەتتەر، باعدارلامالىق قامتاماسىز ەتۋ، سونداي-اق مەملەكەتتىك ەلەكتروندىق اقپاراتتىق رەسۋرستار مەن جۇيەلەردى قالىپتاستىرۋ جانە دامىتۋعا باعىتتالعان.
IT سالاسىنداعى قىزمەتتەردىڭ باسىم بولىگى الماتى مەن استانادا ۇسىنىلدى. جىكتەر بولساق، الماتىداعى كورسەتكىش 369 ملرد تەڭگەدەن اسىپتى. استانادا كورسەتىلگەن قىزمەتتەر ۇلەسى – 292 ملرد تەڭگە. وزگە ايماقتاردىكى 10%-كە دا جەتپەيدى.
البەتتە، سالاعا قىزىعۋشىلىقتى ارتتىرۋ ءۇشىن جالاقىنىڭ ماردىمدى بولعانى ابزال. بۇل دا ەسكەرىلگەن. وتكەن جىلى ورتاشا ايلىق 815 مىڭ تەڭگەدەن اسىپتى. ياعني، ەلدەگى ورتاشا دەڭگەيدەن 2 ەسە كوپ.
ايتپاقشى، الماتىدا 19 قاڭتار كۇنى حالىقارالىق فورۋم وتەدى. وندا IT سالاسىنداعى جەتىستىكتەر مەن كەمشىلىكتەر ساراپقا سالىنباق. تۇيىندەسەك، 2026 جىلى ەلىمىزدەگى IT قىزمەتتەر ەكسپورتى 1 ملرد دوللارعا جەتۋى كەرەك. بۇل – پرەزيدەنتتىڭ پارمەنى. جۇيەلى جۇمىستار ناتيجەسىندە عانا قازاقستان IT مەملەكەتكە اينالادى. بۇل – انىق.
يستوچنيك: https://24.kz/kz/zha-aly-tar/o-am/item/634516-7-alada-it-khab-ashylady
قولدانىلعان ماتەريالدارعا مىندەتتى تۇردە www.24.kz سايتىنا گيپەرسىلتەمە بەرىلۋى ءتيىس