6-9 جاستاعى بالالاردىڭ 20،6%-نىڭ ارتىق سالماعى بار

ونىڭ ىشىندە 6،6%-ى سەمىزدىكپەن اۋىرادى.

ق ر دەنساۋلىق ساقتاۋ ءمينيسترى اجار عينياتتىڭ مالىمەتىنشە، قانت ديابەتىمەن سىرقاتتانۋشىلىق 62%-عا وسكەن، دەپ حابارلايدى Almaty-akshamy.kz

«قازاقستاندا سوزىلمالى ينفەكسيالىق ەمەس اۋرۋلار اۋىرتپالىعىنىڭ ءوسۋى دەنساۋلىق ساقتاۋ جۇيەسىنە دە، جالپى ەل ەكونوميكاسىنا دا جۇكتەمەنىڭ ۇلعايۋىنا ىقپال ەتەدى. قازاقستانداعى بارلىق ءولىم-جىتىمنىڭ 84%-عا جۋىعىنىڭ سەبەبى ينفەكسيالىق ەمەس اۋرۋلار بولىپ وتىر. سوڭعى زەرتتەۋ دەرەكتەرى بويىنشا جۇرەك-تامىر اۋرۋلارى، قانت ديابەتى، سوزىلمالى رەسپيراتورلىق جانە قاتەرلى ىسىك اۋرۋلارى سياقتى ينفەكسيالىق ەمەس اۋرۋلاردىڭ ءتورت نەگىزگى توبىنان مەزگىلسىز قايتىس بولۋ ىقتيمالدىعى ەر ادامداردا ايەلدەرمەن سالىستىرعاندا 27% ءجيى كەزدەسەدى»، - دەدى مينيستر.

ۆەدومستۆو باسشىسى 6-9 جاستاعى بالالاردىڭ اراسىندا ارتىق دەنە سالماعىنا شالدىققانداردىڭ ۇلەسى 20،6% بولعانىن اتاپ ءوتتى.

«ونىڭ ىشىندە بالالاردىڭ 6،6%-ى سەمىزدىكپەن اۋىرادى. قانت ديابەتىمەن سىرقاتتانۋشىلىقتىڭ 62%-عا وسكەنى بايقالادى. دۇنيەجۇزىلىك دەنساۋلىق ساقتاۋ ۇيىمىنىڭ 2017 جىلعى باعالاۋى بويىنشا ينفەكسيالىق ەمەس اۋرۋلاردىڭ 4 نەگىزگى توبىن ەمدەۋگە 300 ملرد تەڭگەدەن استام قاراجات جۇمسالعان. ەڭبەك ونىمدىلىگىنىڭ تومەندەۋىنە بايلانىستى ەكونوميكاعا جۇمسالعاتىن شىعىندار دەنساۋلىق ساقتاۋعا جۇمسالاتىن مەملەكەتتىك شىعىنداردان 6،5 ەسە اسىپ تۇسەدى جانە جىلىنا 2 ترلن تەڭگە بولدى. جالپى، قازاقستان ەكونوميكاسىنا ينفەكسيالىق ەمەس اۋرۋلار كەلتىرىلەتىن اعىمداعى زالال جىلىنا 2،3 ترلن تەڭگەنى قۇرايدى. بۇل ەلدىڭ جىلدىق جالپى ىشكى ءونىمنىڭ 4،5%-نا تەڭ»، - دەدى اجار عينيات.