جۇڭگو 5.5G ينتەرنەت جەلىسىن الەمدە ءبىرىنشى بولىپ قولدانىسقا ەنگىزگەلى جاتىر.
ءموبيلدى جەلى 5G-دەن قاراعاندا 10 ەسە جىلدام. بۇل جوبا الدىمەن پيلوتسىز كولىكتەردى باسقارۋ جۇيەسىندە قولدانىلىپ، سىناقتان ءوتتى. سىناق ءساتتى جۇزەگە اسقان. ەندى ونى ينتەللەكتۋالدىق ءوندىرىس سالاسىنا ەنگىزۋ كوزدەلىپ وتىر، دەپ حابارلايدى Almaty-akshamy.kz 24.kz-كە سىلتەمە جاساپ.
جاڭا ءموبيلدى بايلانىس 5G-ا دەپ تە اتالادى. ماماندار باستاپقى تاجىريبەدە تاپسىرىس جەتكىزۋگە ارنالعان پيلوتسىز جۇرەتىن 100 كولىكتى جەلىگە قوسىپ كوردى. ينتەرنەتتىڭ اسا جىلدامدىعى قوزعالىس قاۋىپسىزدىگى مەن جۇمىس تيىمدىلىگىن ارتتىرعان. جەلىنى سىناۋ ءالى تولىق اياقتالعان جوق. ءقازىر بەيجىڭدە تەكسەرۋ جۇمىستارى جالعاسىپ جاتىر.
«كولىكتەر جولدا ءتۇرلى كەدەرگىلەرگە تاپ بولاتىن. كوپ جاعدايدا جاياۋ جۇرگىنشىلەر، باعدارشامعا توقتاعان وزگە دە كولىكتەر جولدى بوگەيدى. وسى سەبەپتى ءبىز 5.5G ينتەرنەتىنىڭ بازالىق ستانسيالارىن جاقىن ەتىپ ورنالاستىرۋعا ءمان بەردىك. وسىنىڭ ارقاسىندا باعدارشام بەلگىلەرى كولىك بازاسىنا بىردەن جەتەدى. سىناق كۇردەلى جولدارمەن ءجۇرۋ كەزىندە وتە ىڭعايلى بولىپ شىقتى»، - دەيدى باس ساۋلەتشى سزەن ۆەندا.
ءقازىر ەلدە 5G ينتەرنەتتىڭ جىلدامدىعى جاساندى ينتەللەكتىنى پايدالانۋ، 3د جوبالاردى جاساۋ كەزىندە جەتكىلىكسىز بولىپ وتىر. زاماناۋي تەحنولوگيانىڭ تالاپتارىنا تولىق ساي كەلمەيدى. ناقتىراق ايتساق، وتكىزۋ مۇمكىندىگى تومەن. ءارى ەلەكتر قۋاتىن شامادان تىس كوپ تۇتىنادى.
«5.5G وسى ماسەلەنى جويۋعا مۇمكىندىك بەردى. بۇل 5G مەن 6G اراسىنداعى وتپەلى كەزەڭ دەسە بولادى. جەلىنىڭ مۇمكىندىگىن ارتتىرعان سايىن ءتۇرلى سالادا سيفرلىق ونىمدىلىكتىڭ قۋاتى كۇشەيە تۇسەدى. قىزمەتتىڭ جاڭا تۇرلەرى پايدا بولادى. جاڭا جەلى ەكونوميكالىق جاعىنان دا وتە ءتيىمدى»، - دەيدى قىتايدىڭ ەلەكتروندى-اقپاراتتىق يندۋسترياسىن دامىتۋ ينستيتۋتىنىڭ عالىمى سيۋي چانگ.
ءقازىر قىتايلىق بايلانىس وپەراتورلارى 5.5G ينتەرنەتتى قوسۋعا دايىندالىپ جاتىر. باستاپقىدا بۇل جەلى ەلدىڭ 300 قالاسىنا ورنالاستىرىلعالى وتىر. ءقازىردىڭ وزىندە ەلدىڭ 20 پروۆينسياسىنا مىڭنان استام بازالىق ستانسيا قۇرىلىپ قويىلعان. ولاردىڭ ءبارى بيىل تولىقتاي كوممەرسيالىق قولدانىسقا ەنگىزىلمەكشى.