استانادا ءوزىن "ەمشى" رەتىندە تانىستىرىپ، TikTok ارقىلى قىزمەت ۇسىنعان تۇرعىن ءۇش ايەلدى الداپ، 5،5 ملن تەڭگەگە جۋىق قارجىسىن يەمدەنگەن، دەپ حابارلايدى Aqshamnews.kz ءتىلشىسى.
استانا قالاسى پروكۋراتۋراسى مالىمەتىنشە، كۇدىكتى جابىرلەنۋشىلەردىڭ ءبىرىنىڭ سىرقات ەكەنىن ءبىلىپ، «ەرەكشە قابىلەتىممەن ەمدەپ بەرەمىن» دەپ سەندىرگەن. وسى ايەلدەن جانە تاعى ەكى ازاماتشادان جالپى 5،5 ملن تەڭگە العان. تەرگەۋ بارىسىندا ونىڭ بۇل قاراجاتتى قۇمار ويىنعا جۇمساعانى انىقتالعان.
سوتتا ايىپتالۋشى كىناسىن تولىق مويىنداپ، كەلتىرىلگەن شىعىننىڭ ءبىر بولىگىن قايتارعان. پروكۋرور ايىپتى تولىق دالەلدەپ، سوت شەشىمىمەن ول 2 جىل 4 ايعا باس بوستاندىعىنان ايىرىلدى.