وقۋ-اعارتۋ مينيسترلىگى ءبىلىم بەرۋ ۇيىمدارىندا پسيحولوگيالىق قولداۋدى ينستيتۋسيوناليزاسيالاۋ بويىنشا كەشەندى جۇمىس جۇرگىزۋدە.
اتاپ ايتقاندا، 500 وقۋشىعا 1 مامان ەسەبىنەن پەداگوگ-پسيحولوگتارعا جۇكتەمەنى ازايتۋ ماسەلەسى قاراستىرىلۋدا. بۇل تۋرالى بالالاردىڭ قۇقىقتارىن قورعاۋ كوميتەتىنىڭ ءتوراعاسى ناسىمجان وسپانوۆا ايتتى، دەپ حابارلايدى Almaty-akshamy.kz.
پسيحولوگيالىق قولداۋ قىزمەتتەرىن كۇشەيتۋ ماقساتىندا مينيسترلىك بيىل تامىز ايىندا بالالاردى زورلىق-زومبىلىقتان قورعاۋ، ءسۋيسيدتىڭ الدىن الۋ جانە ولاردىڭ قۇقىقتارى مەن سالاماتتىلىعىن قامتاماسىز ەتۋدىڭ 2023-2025 جىلدارعا ارنالعان كەشەندى جوسپارى، سونداي-اق پەداگوگ-پسيحولوگتار مەن الەۋمەتتىك پەداگوگتاردى دايارلاۋعا قويىلاتىن تالاپتاردى قامتيتىن «پەداگوگ» كاسىپتىك ستاندارتى قابىلدانعان بولاتىن.
«مامانداردىڭ نەعۇرلىم ءتيىمدى جۇمىس اتقارۋى ءۇشىن ءبىلىم بەرۋ ۇيىمدارىندا پسيحولوگيالىق قىزمەت ەرەجەلەرى قابىلداندى. مىندەتتى قۇجاتتاردىڭ تىزبەسى قىسقارتىلدى. 8 وڭىردە پسيحولوگيالىق قولداۋ ورتالىقتارى قۇرىلىپ، «سيفرلىق كابينەت» جۇمىس اتقارماق. پەداگوگ-پسيحولوگتاردىڭ جۇمىس ۋاقىتى بەكىتىلىپ، وقىتۋ كۋرستارى ۇيىمداستىرىلدى. ماسەلەن، بيىل 4،5 مىڭعا جۋىق پەداگوگ-پسيحولوگ بىلىكتىلىكتى ارتتىرۋ كۋرستارىنان ءوتتى. اتالعان شارالار بالالار اراسىنداعى كەلەڭسىز قۇبىلىستاردىڭ سانىن ازايتىپ قانا قويماي، ءپوزيتيۆتى ويلاۋدى قالىپتاستىرۋعا مۇمكىندىك بەرمەك»، - دەپ اتاپ ءوتتى ناسىمجان وسپانوۆا.
سونىمەن قاتار، ءبىلىم بەرۋ باعدارلامالارىن جاڭارتۋ جانە ءبىلىم بەرۋ ۇيىمدارىندا ماماندار سانىن ارتتىرۋ بويىنشا جۇمىستار جۇرگىزىلۋدە. بۇدان بولەك، ەلىمىزدىڭ بارلىق وڭىرلەرىندە پسيحولوگيالىق قىزمەت ورتالىقتارىن اشۋ جوسپارلانعان. ايتا كەتەيىك، بۇگىندە ەلىمىزدە 8 مىڭنان استام پەداگوگ-پسيحولوگ جۇمىس اتقارادى.