سۋ رەسۋرستارى جانە يرريگاسيا مينيسترلىگى بيىل سۋ سالاسى ماماندىقتارىنىڭ تارتىمدىلىعىن ارتتىرۋ ءۇشىن ءبىرقاتار ءىس-شارالاردى جۇزەگە اسىردى.
ماسەلەن، «بولاشاق» باعدارلاماسىنا وزگەرىستەر ەنگىزىلىپ، وعان سۋ سالاسىنىڭ ماماندىقتارى قوسىلدى. ناتيجەسىندە، قازاقستاندىق ستۋدەنتتەر اتالعان ماماندىقتار بويىنشا شەتەلدە ءبىلىم الۋ مۇمكىندىگىنە يە بولدى، دەپ حابارلايدى aqshamnews.kz.
«سۋ شارۋاشىلىعى سالاسىنا جاس مامانداردى تارتۋ جانە قىزمەتكەرلەردىڭ بىلىكتىلىگىن ارتتىرۋ مينيسترلىك جۇمىسىنىڭ باسىم باعىتتارىنىڭ ءبىرى بولىپ تابىلادى. بيىل 9 جوعارى وقۋ ورنىمەن ىنتىماقتاستىق تۋرالى مەموراندۋمعا قول قويدى. وسىنىڭ ناتيجەسىندە، 80 ستۋدەنت «قازسۋشار» فيليالدارىندا وندىرىستىك تاجىريبەدەن ءوتتى. بۇدان بولەك، شەتەلدىك ارىپتەس ۋنيۆەرسيتەتتەرمەن قوس ديپلومدىق جانە بىرلەسكەن ءبىلىم بەرۋ باعدارلامالارىن دامىتۋ جونىندە ءىس-شارالار قابىلدانادى»،- دەدى ق ر سريم عىلىم جانە يننوۆاسيالار دەپارتامەنتىنىڭ ديرەكتورى ءمۇسلىم جيەنبايەۆ.