يسلاندياداعى جۇمىسشىلاردىڭ 50%-دان استامى قىسقارتىلعان جۇمىس كەستەسىمەن، ءتورت كۇندىك جۇمىس اپتاسىمەن ەڭبەك ەتىپ جاتىر، دەپ حابارلايدى aqshamnews.kz
CNN جازۋىنشا، يسلاندياداعى كاسىپوداقتار سوت ارقىلى جۇمىس بەرۋشىلەرمەن كەلىسىمگە كەلىپ، ەلدەگى ون مىڭداعان مۇشەلەرىنىڭ جۇمىس ۋاقىتىن قىسقارتۋعا قول جەتكىزگەن. سونىڭ ناتيجەسىندە بىلتىر يسلانديادا جىلدام ەكونوميكالىق ءوسىم بايقالىپ، جۇمىسسىزدىق دەڭگەيى ەۋروپاداعى ەڭ تومەنگى كورسەتكىشتەردىڭ بىرىنە اينالعان.
بۇل تۋرالى بريتاندىق The Autonomy Institute جانە يسلانديانىڭ تۇراقتىلىق پەن دەموكراتيا قاۋىمداستىعى (Alda) مالىمدەدى. عالىمدار كوپ جۇمىسشىدا ەڭبەك ونىمدىلىگى سول كۇيى ساقتالعانىن نەمەسە جاقسارعانىن انىقتاعان. سونىمەن قاتار، ولاردىڭ ءال-اۋقاتى سترەسستىڭ تومەندەۋى، دەنساۋلىق جاعدايىنىڭ جاقسارۋى جانە جۇمىس پەن جەكە ءومىر اراسىنداعى تەپە-تەڭدىكتىڭ جاقسارۋى سىندى ءبىرقاتار كورسەتكىش بويىنشا كۇرت وسكەن.
حالىقارالىق ۆاليۋتا قورىنىڭ وسى اپتادا جاريالانعان «الەمدىك ەكونوميكانىڭ دامۋ بولاشاعى» اتتى سوڭعى بايانداماسىنا سايكەس، 2023 جىلى يسلانديا ەكونوميكاسى 5%-عا وسكەن. بۇل ەۋروپاداعى باي ەكونوميكالار اراسىنداعى ەڭ جىلدام ءوسۋ كورسەتكىشتەرىنىڭ ءبىرى (مالتادان كەيىنگى ەكىنشى ورىن). بۇعان دەيىن يسلانديا ەكونوميكاسىنىڭ ورتاشا ءوسۋ قارقىنى 2%-دى قۇراعان ەدى.