لەونيد يارۋحين بالا كەزىنەن نۋميزماتيكامەن اينالىسادى، دەپ حابارلايدى اlmaty-akshamy.kz «حابار 24»-كە سىلتەمە جاساپ.
ءقازىر ونىڭ قولىندا 400-گە جۋىق مونەتا بار. لەونيد ەڭ العاشقى مونەتانى 4 جاسىندا باقشادان تاۋىپ العان. ول 1738 جىلى شىققان پولشا مونەتاسى بولعان. ال 11 جاسىنان باستاپ نۋميزماتيكاعا شىنداپ بەت بۇرا باستاپتى.
باس كەزىندە ەسكى تيىن-تەبەندەردى ءوزى دەمالۋعا بارعان وزەن-كولدەردىڭ جاعالاۋىنان ىزدەيتىن. كەيىننەن اتا-اناسىنىڭ كەڭەسىمەن ەسكى ەلدى مەكەندەردىڭ ماڭىن قاراۋعا شىعىپ، ىزدەپ تابا باستاعان.
- الدىمەن كارتامەن ول جەردە نە بولعانىن قاراپ الامىز. سودان كەيىن عانا جولعا شىعامىز. وسى كوللەكسيانىڭ ارقاسىندا تالاي جەرگە باردىم. دۇنيەتانىمىم تولىقتى. بۇحار حاندىعى، جوڭعار شاپقىنشىلىعى مەن ەسكى قالالار تۋرالى وقىدىم. مونەتادان بولەك اشەكەي بۇيىمدار مەن ساداق جەبەسىنىڭ ۇشتارىن دا جيناپ ءجۇرمىن. ونىڭ ءبىرازى ءوزىم وقيتىن مەكتەپتىڭ مۋزەيىندە تۇر، - دەيدى لەونيد يارۋحين.
لەونيدتىڭ كوللەكسياسىنداعى مونەتالاردىڭ ەڭ كونەسى VII عاسىرعا تيەسىلى. ءوزىنىڭ ايتۋىنشا، قازىرگى قولدا بار 400-گە جۋىق مونەتانىڭ ءارقايسىسىنىڭ تاريحى بار. ول ەسكى تيىندى تاۋىپ قانا قويماي، ونىڭ نەدەن جاسالعانىن، قاي زاماندا، كىمدەر ۇستاعانىنا دەيىن زەرتتەپ بىلەدى. سول ءداۋىردىڭ تاريحىن مۇقيات وقيدى. ونىڭ جيناعىندا بىرنەشە عاسىر بۇرىن جاسالعان تيىنداردان بولەك، قازاقستاننىڭ ۇلتتىق بانكى اينالىمعا شىعارعان كوللەكسيالىق جانە ينۆەستيسيالىق مونەتالار بار.
ءقازىر لەونيد 8-سىنىپتا وقيدى. ءجۇرىپ-تۇرۋى قيىن بولعاندىقتان، مۇعالىمدەر ونى ۇيگە كەلىپ وقىتادى. "قولاربادا وتىرعانىم ءبىلىم الۋىما ەشقانداي كەدەرگى كەلتىرمەيدى"، - دەيدى لەونيدتىڭ ءوزى. بيىلعى وقۋ جىلىن وتە جاقسى باعامەن اياقتاماق. ول بولاشاعىن تاريحپەن بايلانىستىرادى. وسى سالادا ءبىلىم الىپ، عىلىممەن اينالىسقىسى كەلەدى.