مەملەكەتتىك كەڭەسشى ەرلان ءقاريننىڭ توراعالىعىمەن شەتەلدە كادر دايارلاۋ جونىندەگى رەسپۋبليكالىق كوميسسيانىڭ كەزەكتى وتىرىسى ءوتتى، دەپ حابارلايدى Almaty-akshamy.kz. اقوردا-عا سىلتەمە جاساپ.
كوميسسيا شەشىمىمەن 182 قازاقستاندىق ازاماتقا «بولاشاق» ستيپەندياسى بەرىلدى.
ونىڭ ىشىندە 149 ستيپەنديات ماگيستراتۋرادا، 7 ادام دوكتورانتۋرادا ءبىلىم الادى، سونداي-اق 26 ازامات الەمنىڭ جەتەكشى جوعارى وقۋ ورىندارى مەن وندىرىستىك ورتالىقتارىندا تاعىلىمدامادان وتەدى.
ستيپەندياتتاردىڭ 62 پايىزى جاراتىلىستانۋ-تەحنيكالىق باعىتتا، ال قالعان 38 پايىزى قوعامدىق-گۋمانيتارلىق باعىت بويىنشا ءبىلىم الادى.
سونىمەن قاتار كوميسسيا مۇشەلەرى عالىمدارعا دۇنيەجۇزىنىڭ ماڭدايالدى عىلىمي ورتالىقتارىنان تاعىلىمدامادان ءوتۋ ءۇشىن بەرىلەتىن گرانتتاردى قاراستىردى.
كوميسسيا شەشىمىمەن 328 قازاقستاندىققا گرانت بەرىلدى.
«بولاشاق» ستيپەندياسىنا قۇجات قابىلداۋ بيىلعى قىركۇيەك ايىنىڭ ورتاسىنا دەيىن جالعاساتىنىن ايتا كەتۋ كەرەك.
ال عىلىمي تاعىلىمدامادان ءوتۋ باعدارلاماسىنا كونكۋرستىق ىرىكتەۋ 2023 جىلدىڭ قازان ايىنىڭ ورتاسىنا دەيىن جالعاسادى.
جيىن قورىتىندىسى بويىنشا مەملەكەتتىك كەڭەسشى ءبىرقاتار ناقتى تاپسىرما بەردى.