ۇلتتىق ۆولونتەرلىك جەلى جۇرگىزگەن الەۋمەتتىك زەرتتەۋ 2025 جىلى ەلىمىزدە ۆولونتەرلىك قوزعالىستىڭ جاڭا سەرپىن العانىن كورسەتتى.
زەرتتەۋدىڭ نەگىزگى ماقساتى – قوعامنىڭ ۆولونتەرلىك قىزمەتكە دەگەن كوزقاراسىن باعالاۋ، ونىڭ باسىم باعىتتارىن ايقىنداۋ جانە ازاماتتىق سەكتور مەن مەملەكەتتىك ورگاندار اراسىنداعى ءوزارا بايلانىستىڭ قانشالىقتى ءتيىمدى ەكەنىن انىقتاۋ.
ساۋالناماعا قازاقستاننىڭ بارلىق وڭىرىنەن 11 مىڭنان استام ادام قاتىسىپ، سونىمەن قاتار ۆولونتەرلىك ۇيىمداردىڭ جۇمىسىنا كەشەندى تالداۋ جاسالدى.
زەرتتەۋ قورىتىندىسى بويىنشا، قازاقستاندا ۆولونتەرلىك قىزمەت تۇراقتى تۇردە دامىپ كەلەدى. قازىرگى كەزدە ۆولونتەرلەر سانى 300 مىڭنان اسىپ، ىسكە اسىرىلعان جوبالار بەس ەسە ارتقان. ساۋالناما ناتيجەسى حالىقتىڭ 89 %-ى ۆولونتەرلىك قىزمەت تۋرالى بىلەتىنىن جانە ءاربىر ءۇشىنشى ازاماتتىڭ ۆولونتەرلىك باستامالارعا بەلسەندى تۇردە قاتىساتىنىن ايقىندادى.
سۇرانىسقا يە باعىتتار قاتارىندا الەۋمەتتىك قولداۋ، قورشاعان ورتانى قورعاۋ جانە ءتۇرلى ءىس-شارالاردى ۇيىمداستىرۋعا ارنالعان ۆولونتەرلىك قىزمەتتەر اتالدى. سونىمەن قاتار «يگى ىستەر مارافونى» مەن «جىل ۆولونتەرى» حالىقارالىق سىيلىعى سياقتى باستامالار سالالىق جانە كورپوراتيۆتىك ۆولونتەرلىكتىڭ دامۋىنا اسەرى ەتكەنى دە تالقىلاندى.
جاسالعان زەرتتەۋ ۆولونتەرلىك ۇيىمداردىڭ الەۋمەتتىك ماسەلەلەردى شەشۋدەگى ءرولىن انىقتاپ، ەلدىڭ تۇراقتى دامۋىنا ىقپال ەتە الاتىنىن كورسەتتى.