«بولاشاق» باعدارلاماسى اياسىندا قۇجات قابىلداۋدىڭ ەكىنشى لەگى 2023 جىلعى 3 ساۋىردە باستالىپ، 28 ساۋىرگە دەيىن جالعاسادى، دەپ حابارلايدى اlmaty-akshamy.kz قازاقپاراتقا سىلتەمە جاساپ.
كونكۋرستىق ىرىكتەۋگە قاتىسۋعا ءوتىنىم مەملەكەتتىك قىزمەتتەر پورتالى – eGov.kz ارقىلى ونلاين قابىلدانادى.
جىلدىڭ سوڭىنا دەيىن «بولاشاق» ستيپەندياسىنا وتىنىمدەردى قابىلداۋدىڭ تاعى ەكى لەگى وتەدى: 5 ماۋسىم مەن 7 شىلدە ارالىعىندا، سونداي-اق 17 شىلدە مەن 15 قىركۇيەك ارالىعىندا.
بيىل «بولاشاق» ستيپەندياسى ۇمىتكەرلەرىنە قويىلاتىن تالاپتار كۇشەيتىلدى.
ەندى ۇمىتكەرلەر شەت ءتىلىن مەڭگەرگەنىن راستاۋى ءتيىس.
اعىلشىن تىلىندە اكادەميالىق وقۋعا تۇسۋشىلەر ناتيجەسى كەمىندە 9.0-دەن 6.0، تاعىلىمدامادان وتۋشىلەر ناتيجەسى 9.0-دەن 5.0 IELTS سەرتيفيكاتىن ۇسىنۋى كەرەك.
سونىمەن قاتار جىل باسىندا جەتەكشى شەتەلدىك جوعارى وقۋ ورىندارىندا اكادەميالىق وقۋعا ارنالعان كۆوتالىق ساناتتار ءتىزىمى كەڭەيتىلدى.
وقۋعا تۇسۋشىلەردى قولداۋ ءۇشىن ينجەنەرلىك-تەحنيكالىق كادرلار مەن مەديسينا ماماندارى ءۇشىن جەڭىلدىكتەر ەنگىزىلدى.
اتالعان وزگەرىستەر ارقاسىندا قازاقستاندىق دارىگەرلەر مەن تەحنيكالىق قىزمەتكەرلەردىڭ مەرزىمى 12 ايعا دەيىنگى تەگىن تىلدىك دايىندىقتان ءوتىپ، «بولاشاق» ستيپەندياسى تاعايىندالعاننان كەيىن باعدارلاما اياسىندا ءبىلىم الۋعا ۇسىنىلاتىن ۋنيۆەرسيتەتتەر تىزىمىنەن وقۋ ورنىن تاڭداۋعا مۇمكىندىگى بار.
جالپى العاندا، بيىل ماگيستراتۋرا جانە رەزيدەنتۋرا باعدارلامالارىنا 395 ستيپەنديا، دوكتورانتۋراعا 50 ستيپەنديا، تاعىلىمدامادان ءوتۋ ءۇشىن 110 ستيپەنديا ءبولىندى.