قانداستار قاتارى ارتىپ كەلەدى
جىل باسىنان بەرى 3 مىڭعا جۋىق قانداس جەڭىلدەتىلگەن تارتىپپەن قازاقستان رەسپۋبليكاسى ازاماتتىعىن الدى، دەپ حابارلايدى Almaty-akshamy.kz. قازاقپارات سايتىنا سىلتەمە جاساپ.
بۇل تۋرالى ق ر ىشكى ىستەر مينيسترلىگىنىڭ رەسمي وكىلى ءنۇردىلدا وراز ايتتى.
«بيىلعى 1 قاڭتاردان باستاپ قانداستارعا قازاقستاندا تۇراقتى تۇرۋعا رۇقسات الۋعا جانە قازاقستان ازاماتتىعىنا قابىلداۋعا ءبىر مەزگىلدە قۇجاتتار تاپسىرۋ مۇمكىندىگى زاڭدى تۇردە ەنگىزىلگەن. بۇرىن ولار بۇل پروسەدۋرالاردان بولەك وتەتىن، ال تۇراقتى تۇرۋ ءراسىمى 2 ايعا سوزىلاتىن. سودان كەيىن ءبىر اي ىشىندە تۇرۋعا ىقتيارحات دايىندالدى، سودان كەيىن عانا قازاقستان ازاماتتىعىنا قابىلداۋ ءۇشىن قۇجاتتار تاپسىرۋعا بولاتىن ەدى. ونى قاراۋ مەرزىمى 3 ايعا سوزىلاتىن. ال ءقازىر بارلىق ءۇش كەزەڭ ءبىر ۋاقىتتا وتەدى»، - دەدى ءنۇردىلدا وراز مينيسترلىكتىڭ اپتالىق بريفينگىندە.
ونىڭ ايتۋىنشا، جىل باسىنان بەرى 3 مىڭعا جۋىق وتانداس قازاقستان رەسپۋبليكاسىنىڭ ازاماتتىعىنا وسىنداي تارتىپپەن قابىلدانعان.
«قازىرگى ۋاقىتتا وسى مىسال بويىنشا قانداس كۋالىگىن بەرۋدەن باستاپ، ازاماتتىققا قابىلداۋعا دەيىنگى شارالارعا تارتىلعان بارلىق مەملەكەتتىك ورگاندار (ەحاقم، ءسىم، ءىىم، اقدم، جەرگىلىكتى اتقارۋشى ورگاندار) جۇمىسىنىڭ ءبىرىڭعاي الگوريتمى ەنگىزىلۋدە. ناتيجەسىندە ولار ءار مەملەكەتتىك ورگانعا جەكە-جەكە ەمەس، تەك ءبىر رەت حالىققا قىزمەت كورسەتۋ ورتالىعىنا جۇگىنەتىن بولادى. قۇجاتتار ءتىزىمى دە ەكى ەسەگە قىسقاردى، بارلىق كەزەڭدەردەن ءوتۋ مەرزىمى 90 كۇندى قۇرايدى. ماتەريالداردى بارلىق مەملەكەتتىك ورگاندار قازىرگىدەي كەزەك بويىنشا ەمەس، ءبىر مەزگىلدە قارايتىن بولادى»، - دەپ ءتۇسىندىردى ق ر ءىىم رەسمي وكىلى.