مەملەكەت باسشىسى قاسىم-جومارت توقايەۆتىڭ الماتى قالاسى جۇرتشىلىعىمەن كەزدەسۋى ءوتىپ جاتىر، دەپ حابارلايدى Almaty-akshamy.kz
«الماتى تۇرعىندارىنىڭ سانى جىل سايىن ءوسىپ جاتىر. سونىڭ 60 پايىزى كوشى-قون ارقىلى جۇزەگە اسادى. بۇل جاعداي قالانىڭ الەۋمەتتىك ينفراقۇرىلىمىنا ەلەۋلى اسەر ەتەدى. ءقازىر قالاداعى بالاباقشالاردا 19 مىڭنان استام ورىن جەتپەيدى. بۇل تاپشىلىقتى ازايتۋ ءۇشىن مەملەكەتتىك جانە جەكە مەنشىك بالاباقشالاردى شۇعىل تۇردە سالۋ كەرەك.
سونداي-اق، بالالاردى مەملەكەتتىك ءبىلىم تاپسىرىسى ارقىلى مەكتەپكە دەيىنگى جەكە ءبىلىم بەرۋ مەكەمەلەرىنە ورنالاستىرۋ قاجەت. اكىمدىككە ۇشتەن التى جاسقا دەيىنگى بالالاردىڭ 97 پايىزىن مەكتەپكە دەيىنگى بىلىممەن قامتۋدى تاپسىرامىن. بۇل مىندەتتى 2025 جىلعا دەيىن ورىنداۋ كەرەك.
وقۋشىلاردىڭ سانى جىل سايىن ورتا ەسەپپەن 12-15 مىڭعا ارتىپ كەلەدى. سول سەبەپتى، مەكتەپتەردە ورىن تاپشىلىعى جوعارى. ءقازىر 29 مىڭنان استام وقۋشىعا ورىن جەتپەيدى. بۇل احۋال وقۋشىلاردىڭ ساپالى ءبىلىم الۋىنا كەرى اسەر ەتەدى.
الماتىدا الداعى ەكى جىل ىشىندە «جايلى مەكتەپ» جوباسىمەن 37 مىڭ ورىندىق 22 مەكتەپ سالۋ كەرەك. باستى مىندەت – 2030 جىلعا قاراي ءبىر اۋىسىممەن وقىتۋعا تولىق كوشۋ. ىشكى ميگراسيا قارقىندى دامىپ جاتقاندىقتان، وسىنداي ماسەلەلەر تۋىنداپ وتىر. الايدا، جاس ۇرپاقتى ساپالى بالاباقشا، مەكتەپپەن قامتاماسىز ەتۋ – ءبىزدىڭ مىندەتىمىز. سوندىقتان، بۇل تاپسىرمالار مىندەتتى تۇردە تولىق ورىندالۋى كەرەك».