ۇلتتىق قاۋىپسىزدىك كوميتەتى ارنايى وپەراسيا جۇرگىزدى
اتىراۋ اۋەجايىندا 28 يتەلگى قۇسىن شەتەلگە اكەتپەك بولعان قىلمىستىق توپ ۇستالدى. قازاقپارات بۇل تۋرالى ۇلتتىق قاۋىپسىزدىك كوميتەتىنە سىلتەمە جاساپ حابارلايدى.
ۇلتتىق قاۋىپسىزدىك كوميتەتى ارنايى وپەراسيانى 17 قىركۇيەكتە وتكىزگەن. قازاقستاننىڭ قىزىل كىتابىنا ەنگەن 28 يتەلگى قۇسىن كونتراباندالىق جولمەن شەتەلگە شىعارماق بولعان شەتەلدىكتەر مەن ق ر ازاماتتارى اتىراۋ قالاسىنىڭ اۋەجايىندا ۇستالدى.
ولار قۇستاردى تاياۋ شىعىس ەلدەرىنىڭ بىرىنە جەتكىزۋدى جوسپارلاعان.
«ۇيىمداستىرۋشىلاردىڭ ءبىرىنىڭ تۇرعىلىقتى جەرىن ءتىنتۋ بارىسىندا يتەلگىنى كۇتىپ-ۇستاۋعا ارنالعان ارنايى جابدىقتالعان بولمە، ولاردى ۇيىقتاتۋعا ارنالعان مەديسينالىق پرەپاراتتار تابىلدى. ق ر قىلمىستىق كودەكسىنىڭ 339-بابىنىڭ 3-بولىگى (ءوسiمدiكتەردىڭ نەمەسە جانۋارلاردىڭ سيرەك كەزدەسەتiن جانە قۇرىپ كەتۋ قاۋپi تونگەن، سونداي-اق پايدالانۋعا تىيىم سالىنعان تۇرلەرىمەن، ولاردىڭ بولىكتەرىمەن نەمەسە دەريۆاتتارىمەن زاڭسىز اينالىسۋ) بويىنشا سوتقا دەيىنگى تەرگەپ-تەكسەرۋ جۇرگىزىلۋدە. كەلتىرىلگەن زالالدىڭ سوماسى 200 ملن تەڭگەدەن استام. قىلمىستىق-پروسەستىك كودەكستىڭ 201-بابى 1-بولىگىنە سايكەس وزگە اقپاراتتار جاريا ەتۋگە جاتپايدى»، - دەلىنگەن ۇقك باسپا ءسوز قىزمەتىنىڭ اقپاراتىندا.