تۋريزم جانە سپورت ءمينيسترى ەرمەك مارجىقپايەۆ جۋىردا عانا الەم چەمپيونى اتانعان گروسسمەيستەر قازىبەك نوگەربەكپەن كەزدەسىپ، جەڭىسىمەن قۇتتىقتادى، دەپ حابارلايدى Almaty-akshamy.kz 24.kz-كە سىلتەمە جاساپ.
«بۇل – وتاندىق شاحمات سپورتىنداعى تاريحي وقيعانىڭ ءبىرى. ويتكەنى 1998 جىلى جاسوسپىرىمدەر اراسىنداعى الەم بىرىنشىلىگىندە دارمەن ءسادۋاقاسوۆ باس جۇلدەگە يە بولعان ەدى. ەندى، مىنە، اراعا 26 جىل سالىپ تاعى ءبىر وتانداسىمىز الەم چەمپيوناتىنىڭ تۇعىرىنا كوتەرىلدى. جارىستا توپ جارۋ جەرلەسىمىزگە وڭايعا سوقپاعانى انىق. سوعان قاراماستان جەڭىسكە دەگەن ەرىك-جىگەر مەن شىنايى ءپاتريوتيزمنىڭ جارقىن ۇلگىسىن كورسەتكەن بۇكىل كومانداعا العىس بىلدىرەمىن»، - دەدى ەرمەك مارجىقپايەۆ.
ايتا كەتەيىك، قازىبەك ءۇندىستانداعى 20 جاسقا دەيىنگىلەر اراسىنداعى دۇنيەجۇزىلىك دودادا ب ا ق سىنادى. بايراقتى باسەكەگە باس-اياعى 123 قاتىسۋشى جينالدى. ونىڭ ىشىندە 13 گروسسمەيستەر مەن 28 حالىقارالىق شەبەرلەر بار. ارالارىنان قازاقستاندىق قازىبەك نوگەربەك سۋىرىلىپ العا شىقتى. ول 11 تۋردا 8،5 ۇپاي جينادى. قازىبەك وسىدان 2 جىل بۇرىن گرەكيادا وتكەن 18 جاسقا دەيىنگىلەر اراسىنداعى الەم چەمپيوناتىندا دا راپيد پەن بليس باعىتتارى بويىنشا جەڭىمپاز اتانعان بولاتىن.