جاستار قاناتى رەسپۋبليكالىق «Dombyra party» اكسياسىن ۇيىمداستىردى
2500-دەن استام دومبىراشى ءبىر مەزەتتە قازاقتىڭ تانىمال كۇيلەرىن ورىندادى. بۇل تۋرالى Almaty-akshamy.kz «AMANAT» پارتياسىنا سىلتەمە جاساپ حابارلايدى.
ۇلتتىق دومبىرا كۇنى قارساڭىندا جاستار قاناتى رەسپۋبليكالىق «Dombyra party» اكسياسىن ۇيىمداستىردى. بۇگىندە ەلىمىز بويىنشا 2500-دەن استام دومبىراشى قازاق كۇيلەرىن ورىندادى. اكسياعا «التىن دومبىرا» ونەر ورتالىعىنىڭ 200-دەن استام وقۋشىسى ەلوردا تورىندە قوسىلدى.
باس قالادا وتكەن اكسيادا «التىن دومبىرا» ونەر ورتالىعىنىڭ شاكىرتتەرى «ەركە سىلقىم»، «اداي»، «بالبىراۋىن»، «اكە تولعاۋى» سياقتى شىعارمالاردى ورىندادى.
سونداي-اق ونەر ورتالىعىنىڭ جەتەكشىسى يبراگيم ەسكەندىر جاس دومبىراشىلارمەن بىرگە «كوك تۋدىڭ جەلبىرەگەنى» كومپوزيسيسىن اكاپەللا تۇرىندە ايتتى. شارا بارىسىندا ۇيىمداستىرۋشىلار «قاسيەتتى دومبىرا» اتتى اۋقىمدى بايقاۋ باستاۋ الاتىنىن ايتتى.
بايقاۋ 10-15 جاس ارالىعىنداعى جاسوسپىرىمدەر مەن 16-35 جاس ارالىعىنداعى جاستار اراسىندا وتەدى. ول وتىنىمدەردى قابىلداۋ، وفلاين تىڭداۋ جانە فينال بولىپ ءۇش كەزەڭنەن تۇرادى. وتىنىمدەر 31 شىلدەگە دەيىن قابىلدانادى. بايقاۋ تۋرالى تولىق اقپاراتتى پارتياجاستار ۇيىمىنىڭ الەۋمەتتىك جەلىلەردەگى رەسمي پاراقشالارىنان تابا الاسىزدار.