XVII «ەۋرازيا» كينوفەستيۆالى شاكەن ايمانوۆ پەن «قازاقفيلم» كينوستۋدياسىنىڭ مەرەيتويلارىنا ەرەكشە ءمان بەرمەك، دەپ حابارلايدى aqshamnews.kz.
«ەۋرازيا» – قازاقستانداعى ەڭ ءىرى كينوفورۋم جانە حالىقارالىق كينوپروديۋسەرلەر قاۋىمداستىقتارى فەدەراسياسى (FIAPF) اككرەديتتەگەن ورتالىق ازياداعى بىردەن-بىر كينوفەستيۆال. فەستيۆالدىڭ تۇراقتى قۇرىلتايشىسى ءارى ۇيىمداستىرۋشىسى ق ر مادەنيەت جانە اقپارات مينيسترلىگى.
كينوفەستيۆالدى ۇيىمداستىرۋ شاكەن ايمانوۆ اتىنداعى «قازاقفيلم» ۇلتتىق كينوستۋدياسىنا تاپسىرىلدى. مۇنىڭ وزىندىك سەبەبى دە بار. وسى جىلى كينوستۋديا بىرنەشە ماڭىزدى مەرەيتويدى اتاپ وتۋدە. بىرىنشىدەن، كينوستۋديانىڭ 90 جىلدىعى. ەكىنشىدەن، قازاق كينوسىنىڭ مايتالمانى - شاكەن ايمانوۆتىڭ تۋعانىنا 110 جىل جانە «قازاقفيلم» كينوستۋدياسىنا ونىڭ ەسىمى بەرىلگەنىنە 40 جىل تولدى. الداعى فەستيۆالدە وسى ايتۋلى داتالارعا ەرەكشە ءمان بەرىلمەك.
بۇگىندە «ەۋرازيا» كينوفەستيۆالى - ورتالىق ازيا وڭىرىندەگى ەڭ ماڭىزدى مادەني شارالاردىڭ بىرىنە اينالدى. 1998 جىلى فەستيۆال قۇرىلعان ساتتەن باستاپ «ەۋرازيا» داستۇرىندە وسكەن قازاقستاندىق كينەماتوگرافيستەردىڭ تۇتاس بۋىنى قالىپتاستى. ولاردى «ەۋرازيا ۇرپاعى» دەپ اتاۋعا بولادى.
ۇيىمداستىرۋشىلاردىڭ ايتۋىنشا، بيىل كينوفەستيۆال اياسىندا حالىقارالىق بايقاۋ وتەدى، مۇندا ەۋروپا مەن ازيا ەلدەرىنىڭ تولىقمەتراجدى فيلمدەرى، سونداي-اق ورتالىق ازيا مەن تۇركى الەمى ەلدەرىنىڭ فيلمدەرى ۇسىنىلادى. «ەۋرازيا» ىسكەرلىك الاڭى دا كوپتەگەن جاڭالىقتارعا تولى بولماق. «تۇران» ۋنيۆەرسيتەتى مەن ت.جۇرگەنوۆ اتىنداعى قازاق ۇلتتىق ونەر اكادەمياسىندا ءتۇرلى شەبەرلىك ساباقتارى مەن دوڭگەلەك ۇستەلدەر ۇيىمداستىرىلادى. كينەماتوگرافيستەر پروكك (كينەماتوگرافيستەردىڭ كاسىبي كلۋبى) اياسىندا ءوزارا تاجىريبە الماسادى.
XVII «ەۋرازيا» حالىقارالىق كينوفەستيۆالىنىڭ سالتاناتتى اشىلۋ ءراسىمى 24 قاراشادا قالانىڭ ەڭ ءساندى ورىندارىنىڭ ءبىرى - Almaty Theatre وتەدى.
سونداي-اق، ءار جىلدارى فەستيۆالدىڭ قۇرمەتتى قوناقتارى قاتارىندا كاترين دەنيەۆ، كيەۆين كوستنەر، يزابەل ادجاني، پەر ريشار، سوفي مارسو، دجەرەمي ايرونس، ورنەللا مۋتي، ستيۆەن سيگال، سيگۋرني ۋيۆەر، جەرار دەپاردە جانە باسقا دا كوپتەگەن الەمدىك كينو جۇلدىزدارى بولعانىن اتاپ وتكەن ءجون.