ەلىمىز بويىنشا ميلليوننان استام ازامات وسى زاڭمەن جاعدايىن تۇزەي الادى.
الماتىدا 214 مىڭنان استام ادام ءبىر جىلدان بەرى نەسيەلەرى بويىنشا تولەم جۇرگىزبەگەن. ولار وزدەرىن بانكروت دەپ جاريالاۋى مۇمكىن، دەپ حابارلايدى Almaty-akshamy.kz
الايدا ماماندار بۇل جەڭىلدىكتىڭ ارتىندا ءبىراز شەكتەۋلەر بارىن العا تارتىپ وتىر. مەملەكەتتىك كىرىستەر كوميتەتىنىڭ ماماندارى تۇسىندىرمە جۇمىستارىن جۇرگىزدى.
رەسپۋبليكا بويىنشا ءبىر ميلليوننان استام ازامات وسى زاڭ اياسىندا جاعدايىن تۇزەي الادى. مامانداردىڭ ايتۋىنشا، ولاردىڭ دەنى، ياعني، 215 مىڭعا جۋىعى الماتىدا تۇرىپ جاتىر. سول سەبەپتى، حالىققا جاڭا زاڭنىڭ تەتىكتەرىن ءتۇسىندىرۋ ءدال وسى شاھاردان باستالعان، دەپ جازادى qazaqstan.tv.
«بۇل زاڭ بارلىق قازاقستاندىقتى بانكروت اتاندىرۋ ماقساتىن ۇستانبايدى. بۇل زاڭ قارىزدىق اۋىرتپاشىلىققا باتقان ازاماتتاردىڭ تەتىكتەرىن شەشۋگە ارنالعان. مۇلدەم كەشىرىلمەيتىن قارىزدار دا بار. ول، مىسالى، باسقا ادامعا، ونىڭ ومىرىنە، دەنساۋلىعىنا كەلتىرىلگەن زيان، سونداي-اق اليمەنتتىك تولەمدەر»، - دەدى ق ر قارجى مينيسترلىگى مەملەكەتتىك كىرىستەر كوميتەتى ءبولىمىنىڭ وكىلى مەرۋەرت سەيسەمبايەۆا.
"بۇل رەتتە، حالىق اراسىندا وسى زاڭعا قاتىستى نەسيەگە امنيستيا جاريالاۋ سىندى جاڭساق تۇسىنىك قالىپتاسقان، الايدا، ونىڭ جاۋاپكەرشىلىگى وزگەشە ەكەنىن تۇسىنگەن ءجون"، - دەيدى قارجىگەرلەر. ماسەلەن، بانكروتتىق ءراسىمدى ىسكە اسىرعاننان كەيىن 5 جىل بويى نەسيە بەرىلمەيدى. سونداي-اق مەملەكەت تاراپىنان بورىشكەردىڭ قارجى جاعدايىنا 3 جىل بويى مونيتورينگ جاسالادى. جاڭا زاڭ ناۋرىز ايىنان باستاپ قولدانىسقا ەنەدى.