قۇرلىق اسكەرلەرى پرەزيدەنت جارلىعىمەن 1993 جىلى بۇرىنعى ورتا ازيا اسكەري وكرۋگىنىڭ 40-شى جالپى اسكەري ارمياسى نەگىزىندە قۇرىلدى.
قۇرلىق اسكەرلەرىنىڭ بۇگىنگى الەۋەتى ەلىمىزدىڭ اۋماقتىق تۇتاستىعى مەن ەگەمەندىگىن قورعاۋ، مەملەكەتتىك جانە اسكەري نىسانداردى كۇزەتۋ، زاڭسىز قارۋلى توپتارمەن كۇرەس، سونداي-اق ەلىمىز راتيفيكاسيالاعان حالىقارالىق شارتتارعا سايكەس تاپسىرمالاردى ورىنداۋعا تولىق قابىلەتتى.
بۇگىندە قۇرلىق اسكەرلەرىنىڭ قۇرامىنا «استانا»، «شىعىس»، «باتىس»، «وڭتۇستىك» وڭىرلىك قولباسشىلىقتارى، تىلدىق جانە تەحنيكالىق قامتاماسىز ەتۋ قۇرامالارى مەن بولىمدەرى، قۇرلىق اسكەرلەرىنىڭ اسكەري ينستيتۋتى، شوقان ءۋاليحانوۆ اتىنداعى قورعانىس مينيسترلىگىنىڭ اسكەري كوللەدجى كىرەدى، دەپ حابارلايدى aqshamnews.kz قورعانىس مينيسترلىگىنىڭ مالىمەتىنە سىلتەمە جاساپ.
قۇرلىق اسكەرلەرى قولباسشىلىعىنىڭ نەگىزگى كۇش-جىگەرى تۇراقتى جاۋىنگەرلىك دايىندىقتى ساقتاۋعا، اسكەري باسقارۋ ورگاندارى مەن اسكەرلەردى جاۋىنگەرلىك ماقساتقا سايكەس مىندەتتەردى شەشۋگە دايىنداۋعا باعىتتالعان.
2024 جىلى اسكەرلەردى دايارلاۋ بارىسىندا 40 000-نان استام ءىس-شارالار جۇزەگە اسىرىلدى. ونىڭ ىشىندە 2000-نان استام اسكەري مىندەتتىلەر وقىتىلىپ، 70-تەن استام جۇمىلدىرۋ وقۋ-جاتتىعۋلارى مەن جاتتىعۋلار وتكىزىلدى.
جىل سايىن قۇرلىق اسكەرلەرىنىڭ بولىمدەرى مەن بولىمشەلەرى حالىقارالىق جانە وڭىرلىك جاتتىعۋلارعا قاتىسادى. شتابتىق، كوماندالىق-شتابتىق وقۋ-جاتتىعۋلار، اسكەري ويىندار، جيىندار مەن كۋرستىق دايىندىق قازىرگى زامانعى قارۋلى قاقتىعىستاردى تالداۋدى ەسكەرە وتىرىپ جۇرگىزىلەدى.
تاجىريبە الماسۋ جانە اسكەرلەردىڭ ەكىجاقتى فورماتتاعى ۇيلەسىمدىلىگىن ارتتىرۋ ماقساتىندا ءۇندىستان قارۋلى كۇشتەرى بولىمشەلەرىمەن «كازيند»، قىرعىز رەسپۋبليكاسىمەن «دالا سۇڭقارى»، وزبەكستان رەسپۋبليكاسىمەن «حامقورلىق» بىرلەسكەن وقۋ-جاتتىعۋلارى ءوتتى. وڭتۇستىك» وڭىرلىك قولباسشىلىعىنىڭ اسكەري قىزمەتشىلەرى پاكىستان يسلام رەسپۋبليكاسىندا وتكەن حالىقارالىق جارىستىڭ جەڭىمپازى اتانىپ، جاۋىنگەرلىك دايىندىقتىڭ جوعارى دەڭگەيىن كورسەتتى.
قۇرلىق اسكەرلەرى اسكەري تەحنيكانىڭ جاڭا ۇلگىلەرىمەن، جوعارى دالدىكتەگى قارۋ-جاراقپەن، زاماناۋي بايلانىس قۇرالدارىمەن، بارلاۋ جانە اۆتوماتتاندىرىلعان باسقارۋ جۇيەلەرىمەن قامتىلعان. جوعارى ءموبيلدى، تەحنيكالىق جابدىقتالعان جانە جاۋىنگەرلىك قابىلەتتى قۇرلىق اسكەرلەرى ەگەمەندىكتى، ەلدىڭ اۋماقتىق تۇتاستىعىن جانە ازاماتتاردىڭ بەيبىت ءومىرىن قورعاۋعا دايىن.