تاۋەلسىزدىكتىڭ 30 جىلدىعى قارساڭىندا ەلگە ەلەۋلى ۇلەس قوسقان جاستاردى نازاردا ۇستادىق. سونىڭ ءبىرى جاس اقىن، شابىتتىڭ گران-پري يەگەرى، حالىقارالىق بەيبىتشىلىك الەمى سىيلىعىنىڭ 1 دارەجەلى ديپلومانتى باتىرحان سارسەنحانمەن سۇحباتتاسقان بولاتىنبىز.
– ءالقيسسانى ەگەمەندىك سىزگە نە بەردى دەپ باستاساق؟
– ءيا، بۇل - ءتاڭىردىڭ ءتاتتى سىيى! ەشكىم جاساي الماس، كوپ جۇرت اڭساعانمەن قولى جەتە قويمايتىن دۇنيە. بۇل عالامشاردا بايتاق، دارحان كوڭىلدى قازاق دەيتىن حالىقتىڭ ۇرپاعى بولۋ عانيبەت. تەك تامسانىپ جۇرە بەرۋ از. ارەكەت ەتىپ، ەلدى شارىقتاتۋدىڭ جولىن ىزدەگەن ابزال. بارشاعا ورتاق قۇندىلىق ءار ۋاقىتتا ءوز ماڭىزىن جوعالتپاسى انىق. بارىنەن دە رۋحاني تاۋەلسىز بولعانعا نە جەتسىن؟!
– بىردە "كوپشىلىكتەن وزۋ وڭاي" دەپسىز، كەڭىرەك توقتالساڭىز؟
– مەنىڭ اعامنىڭ 15 شاقتى قويى بار. جىلدا تولدەيدى. ءبىرقاتارى جازعا جەتپەيدى. وسىلاي ۋاقىت وتەدى. تۇك وزگەرىسسىز. مەن بۇلاي ءجۇرۋدى ءجون كورمەدىم. ءوز داڭعىلىمدى ىزدەدىم. ول – اقىندىق. بىلەسىز بە؟ ءتاڭىر ءوزى بەرگەن جالىنىن ءوزى قوريدى. ادامداردى مويىنداتۋ قيىن ەمەس. تەك باعىتتى ايقىنداساڭىز بولعانى. ءال-فارابي، ابايلار قيىن كەزەڭدە عۇمىر كەشتى. ەسەسىنە وشپەس ءىز قالدىردى.
– قوعامدا "اقىندار" دەسە، قاعاز، قالام، قيال ەلەستەيدى. ءسىزدىڭ ءحوببيىڭىز قانداي؟
– ونىڭىز راس! دەسە دە، لوگيكالىق نارسەلەرگە جاقىنداۋمىن. ول ءۇشىن ۇدايى شاحمات وينايمىن. جانىمدى جەپ وينايمىن دەپ تە ايتا الامىن. ميدىڭ قىرتىستارىن قوزعايدى. كونە ءۇندىستان، مىسىردا پاتشالار ەليتالىق توپ وكىلدەرىنىڭ سۇيىكتى ويىنى سانالعان. مەن دە قۇشتارمىن. جالپى، بەرەرى كوپ. فۋتبولدى دا جاقسى كورەمىن. شابۋىلشى. سەرگىتەدى.
– ارمانسىز ادام - قاناتسىز قۇسپەن تەڭ دەپتى. بولاشاقتاعى باتىرحان قانداي؟
– مەنىڭ ءاردايىم ويلاناتىن تاقىرىبىم. كۇنىگە كەم دەگەندە ەكى كىسىگە جاقسىلىق ىستەۋ - ماقساتىم. ال ادامدارعا جىميىپ قاراۋ - داعدىم. وسى قاسيەتتەر ومىرلىك ۇستانىمعا اينالۋدا. بالكىم، كەلەشەكتە الەمدى باعىندىرارمىن. 2038 جىلى نوبەل سىيلىعىنىڭ لاۋرەتى اتانامىن. بۇل - ايدى اسپانعا شىعاراتىن جاڭالىق. سول كۇنگە ءبارىمىزدى بىرگە جەتكىزسىن. سونداي-اق، ساربوننا ۋنيۆەرسيتەتىنىڭ ماڭدايشاسىندا «ساعان قۇداي بەرمەگەندى، ساربوننا ۋنيۆەرسيتەتى بەرە المايدى» دەپ جازىلىپ تۇرادى ەكەن. بۇل پارادوكس! بولماساڭ دا، ۇقساي ءبىلىڭىز!
– سۇحباتىڭىزعا راقمەت! ءاردايىم الدا بولىڭىز!