بۇل جونىندە ق ر وقۋ-اعارتۋ ءمينيسترى جۇلدىز سۇلەيمەنوۆا ازيا دزيۋدو وداعى وكىلدەرىن قابىلداۋىندا ايتتى.
ءمينيستردىڭ ازيا دزيۋدو وداعىنىڭ پرەزيدەنتىنىڭ كەڭەسشىسى، بىرنەشە دۇركىن الەم چەمپيونى ايدار ماحمەتوۆ جانە «جەڭىس» سپورت كلۋبىنىڭ باس ديرەكتورى تيمۋر تۇرسىنبايەۆپەن كەزدەسۋىندە 2026 جىلدان باستاپ پيلوتتىق نەگىزدە «كەلەشەك مەكتەپتەرىندە» دزيۋدو سپورت ءتۇرىن سەكسيالىق فورماتتا ىسكە قوسۋ پەرسپەكتيۆاسى تالقىلاندى.
ەستەرىڭىزگە سالا كەتەيىك، قازاقستاندا مەملەكەت باسشىسىنىڭ تاپسىرماسىمەن «كەلەشەك مەكتەپتەرى» ۇلتتىق جوباسىنىڭ اياسىندا سالىنىپ جاتقان 217 جاڭا فورماتتاعى مەكتەپتەردە 460 مىڭنان استام وقۋشى ءبىلىم الادى. بۇگىندە بۇل جاڭاشىل فورماتتاعى مەكتەپتەر قازاقستاندىق ءبىلىم بەرۋ جۇيەسىنىڭ ينفراقۇرىلىمدىق جاڭارۋىنىڭ جانە ءبىلىم بەرۋدەگى يننوۆاسيالاردى ەنگىزۋدىڭ اۆانگاردىنا اينالدى.
«كەلەشەك مەكتەپتەرىندە ساپالى ءبىلىم، سانالى تاربيە بەرۋمەن قاتار، شىعارماشىلىق، زياتكەرلىك، سپورتتىق ۇيىرمەلەر ارقىلى بالالاردىڭ بويىندا سىني ويلاۋ، باسقارۋشىلىق، تاكتيكالىق شەشىم قابىلداۋ، فيزيكالىق دامۋ، وزىنە تالاپ قويۋ، تارتىپكە باعىنۋ، شىدامدى بولۋ جانە توزىمدىلىكتى دامىتۋ، جەڭىسكە ۇمتىلۋ داعدىلارىن ەرتە جاستان قالىپتاستىرۋعا دا باسىمدىق بەرىلۋى ءتيىس. سوڭعى جىلدارى دزيۋدوعا قازاقستاندىقتاردىڭ قىزىعۋشىلىعى ارتىپ، ول تانىمال سپورت تۇرىنە اينالىپ كەلەدى، سوندىقتان مينيسترلىك فەدەراسيامەن ىنتىماقتاستىقتا جۇمىس جاساۋعا نيەتتى»، — دەدى وقۋ-اعارتۋ ءمينيسترى جۇلدىز سۇلەيمەنوۆا.
ءوز كەزەگىندە دزيۋدو فەدەراسياسىنىڭ وكىلدەرى 217 «كەلەشەك مەكتەبىندە» اشىلاتىن دزيۋدو ۇيىرمەلەرى ءۇشىن جاتتىقتىرۋشىلاردى كاسىبي دايىنداۋدى، سونىمەن بىرگە مەكتەپ زالدارىن قاجەتتى سپورتتىق قۇرال-جابدىقتارمەن، قاتىسۋشى وقۋشىلاردى ارنايى كيمونومەن قامتاماسىز ەتۋدى ءوز مىندەتتەرىنە الاتىندارىن جەتكىزدى.
ايتا كەتۋ كەرەك، جوبانى جۇزەگە اسىرۋدا اسىرەسە، اۋىل مەكتەپتەرىنە باسىمدىق بەرىلەدى.