مەملەكەت باسشىسى جۇرگىزىپ وتىرعان اۋقىمدى ەكونوميكالىق رەفورمالار اياسىندا 2025 جىلى پروكۋراتۋرا ورگاندارى مەملەكەت پەن قوعامنىڭ ەكونوميكالىق مۇددەلەرىن قورعاۋ باعىتىندا ەلەۋلى ناتيجەلەرگە قول جەتكىزدى. بۇل تۋرالى بەرىك اسىلوۆ ح (X) الەۋمەتتىك جەلىسىندەگى جازباسىندا مالىمدەدى، - دەپ حابارلايدى aqshamnews.kz ءتىلشىسى.
ونىڭ ايتۋىنشا، جىل باسىنان بەرى پروكۋرورلار مەملەكەت مۇددەلەرىن قورعاۋ بويىنشا جالپى سوماسى 1،1 ترلن تەڭگەدەن استام ناتيجەگە قول جەتكىزگەن. مەملەكەت پايداسىنا مەملەكەتتىك قاراجاتتى جۇمساۋ، مەملەكەتتىك ساتىپ الۋ، قورشاعان ورتانى قورعاۋ، جەر قويناۋىن پايدالانۋ جانە جەردى ۇتىمدى پايدالانۋ سالالارىندا 470 ملرد تەڭگە كولەمىندەگى اقشا مەن مۇلىك تاركىلەنگەن.
باس پروكۋراتۋرا قارجى جانە ادىلەت مينيسترلىكتەرىمەن بىرلەسىپ جۇرگىزگەن تەكسەرۋلەردىڭ ناتيجەسىندە 3 جىلدان استام ۋاقىت بويى بۇعاتتاۋلى تۇرعان جانە بيۋدجەتكە تولەنبەگەن 193 ملرد تەڭگە ديۆيدەندتى مەملەكەت كىرىسىنە قايتارۋ بويىنشا شارالار قابىلداندى.
سونداي-اق مەملەكەت مەنشىگىنە الاتاۋ باۋرايىنداعى، كاسپيي تەڭىزى جاعالاۋىنداعى، بۋراباي ۇلتتىق پاركىندە ورنالاسقان وليگوپوليالىق قۇرىلىمداردىڭ جەرلەرى، ۇزاق جىلدار بويى پايدالانىلماعان قوعامدىق جايىلىمدار جانە وزگە دە القاپتار قايتارىلدى. جالپى كولەمى 800 مىڭ گەكتار اۋىل شارۋاشىلىعى ماقساتىنداعى جەر مەملەكەتكە ءوتتى. ناتيجەسىندە ءبىرقاتار وڭىرلەردە جايىلىم تاپشىلىعى ماسەلەسى ءىس جۇزىندە شەشىلىپ، اۋىل تۇرعىندارىنا جەردى ەركىن پايدالانۋ مۇمكىندىگى قامتاماسىز ەتىلدى.
پرەزيدەنت بەكىتكەن ىشكى ساياسات قاعيداتتارى مەن «تازا قازاقستان» تۇجىرىمداماسى اياسىندا تابيعات پايدالانۋشىلار كەلتىرگەن 25 ملرد تەڭگە كولەمىندەگى ەكولوگيالىق زالال وتەلدى. سيفرلىق تەحنولوگيالار، عارىشتىق مونيتورينگ جانە جاساندى ينتەللەكت ەلەمەنتتەرىن قولدانۋ ارقىلى ەكولوگتارمەن بىرلەسىپ 3،8 مىڭنان استام زاڭسىز قوقىس ورنى جويىلدى، ال قۇرىلىس سالۋشىلار 300 مىڭنان استام جاڭا جاسىل جەلەك وتىرعىزدى.
مەملەكەتتىك باسقارۋدىڭ تيىمدىلىگىن ارتتىرۋ تۋرالى پرەزيدەنت جارلىعىن ورىنداۋ شەڭبەرىندە پروكۋرورلار جەرگىلىكتى اتقارۋشى ورگانداردىڭ شىعىستارىن وڭتايلاندىرىپ، 255 ملرد تەڭگە كولەمىندەگى نەگىزسىز مەملەكەتتىك شىعىنداردىڭ الدىن الدى. بۇل كورسەتكىش تۇتاس ءبىر ءوڭىردىڭ جىلدىق بيۋدجەتىمەن پارا-پار.
اتاپ ايتقاندا، پاۆلودار مەن اتىراۋ وبلىستارىندا جەرگىلىكتى ورگانداردىڭ ارنايى تەحنيكا مەن تۇرعىن ۇيلەردى نارىقتىق باعادان ءۇش ەسە قىمبات ساتىپ الۋ جوسپارلارى توقتاتىلىپ، ۇنەمدەلگەن قاراجات الەۋمەتتىك قاجەتتىلىكتەر مەن ينفراقۇرىلىمدى دامىتۋعا باعىتتالدى.
پروكۋرورلاردىڭ ءوتىنىشحاتتارى مەن نارازىلىقتارى نەگىزىندە 300-دەن استام ازاماتتىق جانە اكىمشىلىك ءىس قايتا قارالىپ، مەملەكەت پايداسىنا 22 ملرد تەڭگە ءوندىرىلدى. مىسالى، ەكى جەكە كومپانيانىڭ كرەديتتىك بەرەشەگى ءۇشىن مەملەكەتتەن 1،2 ملرد تەڭگە ءوندىرىپ الۋ تۋرالى شەشىم جويىلسا، كەرىسىنشە، ورىندالماعان قارۋ-جاراقتى جوندەۋ جۇمىستارى ءۇشىن مەملەكەتتىك قورعانىس تاپسىرىسى پايداسىنا 800 ملن تەڭگە ءوندىرىلدى.
بەرىك اسىلوۆتىڭ ايتۋىنشا، قوعام مەن مەملەكەتتىڭ ەكونوميكالىق مۇددەلەرىن قورعاۋ سالاسىنداعى پروكۋرورلىق قاداعالاۋدىڭ تيىمدىلىگى سيفرلىق تەحنولوگيالار مەن جاساندى ينتەللەكت ەلەمەنتتەرىن كەڭىنەن ەنگىزۋ ەسەبىنەن الداعى ۋاقىتتا دا ارتا بەرمەك.