قازاقستان رەسپۋبليكاسى وقۋ-اعارتۋ مينيسترلىگىنىڭ مالىمەتىنشە، 2025 جىلى بالالاردى مەكتەپكە دەيىنگى تاربيە جانە وقىتۋمەن قامتۋدى 95%-عا دەيىن ۇلعايتۋ جوسپارلانىپ وتىر، دەپ حابارلايدى aqshamnews.kz
مەكتەپكە دەيىنگى ۇيىمدارعا بارمايتىن بالالاردىڭ اتا-انالارىنا ادىستەمەلىك قولداۋ كورسەتۋ ماقساتىندا، بالالاردىڭ وتباسىلىق جاعدايدا تاربيە الۋى، دامۋى جانە كۇتىمى ماسەلەلەرى بويىنشا كەڭەس بەرۋ پۋنكتى سانىن 4 245-كە دەيىن ارتتىرۋ جوسپارلانعان. مەملەكەتتىك 260 بالاباقشادا قايتا جوندەۋ جۇمىستارى جۇرگىزىلىپ، قۇرال-جابدىقتار جاڭارتىلادى. 500 مىڭ بالا قازاق ءتىلىن تەرەڭ وقىتۋ بويىنشا «تىلگە بويلاۋ» پيلوتتىق جوباسىنا قاتىسادى. 2025 جىلى ەلىمىزدىڭ بارلىق وڭىرىندە «قاراجاتتى بالانىڭ سوڭىنان ىلەستىرۋ» قاعيداتى بويىنشا مەكتەپكە دەيىنگى تاربيە جانە وقىتۋ ۇيىمدارىن ۆاۋچەرلىك قارجىلاندىرۋ جۇيەسىن ەنگىزۋ جوسپارلانىپ وتىر.
ورتا ءبىلىم بەرۋدە 272،8 مىڭ وقۋشىعا ارنالعان ورىن ەنگىزۋ؛ ەرەكشە قاجەتتىلىگى بار بالالاردىڭ 90%ىن ارنايى پسيحولوگيالىق-پەداگوگيكالىق قولداۋ جانە ەرتە جاستان تۇزەتۋ شارالارىمەن قامتۋ؛ فيزيكا، حيميا، بيولوگيا، روبوتوتەحنيكا، STEM پاندەرى بويىنشا 1 مىڭ زاماناۋي كابينەت ساتىپ الۋ؛ 1،3 مىڭ اۋىل مەكتەبىن قايتا جاڭارتۋ جوباسىن ىسكە قوسۋ جوسپارلانۋدا.
كوللەدجدەردە تەحنيكالىق جانە كاسىپتىك ءبىلىم بەرۋ باعىتى بويىنشا سۇرانىسقا يە ماماندىقتارعا (9-سىنىپ تۇلەكتەرىن) 100% تەگىن وقىتۋمەن قامتۋ؛ جۇمىسقا ورنالاستىرۋ مىندەتتەمەسىمەن ماقساتتى تاپسىرىستى 10 مىڭ ورىنعا ۇلعايتۋ؛ جان باسىنا شاققانداعى نورماتيۆتىك قارجىلاندىرۋ كولەمىن 2 ەسەگە ارتتىرۋ؛ جەكە ينۆەستيسيا تارتۋ ارقىلى 80 كوللەدجدىڭ ماتەريالدىق-تەحنيكالىق بازاسىن نىعايتۋ جانە جابدىقتاۋ؛ كوللەدجدەردە شاعىن 10 كاسىپورىن اشۋ جوسپارلانىپ وتىر.