قازنەتتە 2025 جىلى پايدا بولاتىن جاڭا Seers ىندەتى تالقىلانۋدا، دەپ حابارلايدى almaty-akshamy.kz stopfake.kz سىلتەمە جاساپ.
Seers ۆيرۋسى تابيعاتتا جوق. ونى ادامدار ويلاپ تاپقان. دالىرەك ايتقاندا، دجونس حوپكينس ورتالىعى مەن ددۇ جانە ەرلى-زايىپتى گەيتستەر قورى. 2022 جىلدىڭ قازان ايىندا بريۋسسەلدە Grand Challenges جينالىسىندا «اسا ءقاۋىپتى ينفەكسيا» اتتى ترەنينگ ءوتتى. وعان دەنساۋلىق ساقتاۋ ۇيىمدارىنىڭ قىزمەتكەرلەرى مەن مەملەكەتتىك قىزمەتكەرلەر تارتىلدى. توپقا سەنەگال، سينگاپۋر، رۋاندا، نيگەريا، انگولا، ءۇندىستان، ليبەريا جانە گەرمانيا ەلدەرىنەن 10 جوعارى لاۋازىمدى شەنەۋنىك كىردى.
سەمينارعا قاتىسۋشىلار COVID-19-دان دا جۇقپالى بولاتىن اۋرۋعا قالاي دەن قويۋعا بولاتىنىن، اۋرۋدىڭ تارالۋىن بولدىرماۋ ءۇشىن قانداي ساياسي شەشىمدەر قابىلداۋ كەرەكتىگىن تالقىلادى.
مىسال رەتىندە Seers (Severe Epidemic enterovirus respiratory syndrome – اۋىر ەپيدەميالىق ەنتەروۆيرۋستىق رەسپيراتورلىق سيندروم) دەپ اتالاتىن ويدان شىعارىلعان پاندەميا الىندى.
ترەنينگ ءۇشىن دجونس حوپكينس ورتالىعى نۇسقاۋلىق ۆيدەو تۇسىرگەن، وندا سەنارييدىڭ ويدان شىعارىلعانى بىرنەشە رەت ايتىلادى. بۇل ۆيدەو ورتالىقتىڭ YouTube ارناسىندا ءالى دە بار جانە بارشاعا قولجەتىمدى.
ال كونسپيرولوگتار وقىتۋ ترەنينگىن اسا ءقاۋىپتى اۋرۋدىڭ تارالۋىنىڭ سەنارييى رەتىندە ۇسىنعان. بۇل تۋرالى العاشقى فەيكتەر 2022 جىلدىڭ جەلتوقسانىندا شىقتى. ولاردى «رەيتەر» جوققا شىعاردى. دجونس حوپكينس دەنساۋلىق قاۋىپسىزدىگى ورتالىعىنىڭ قوعاممەن بايلانىس جونىندەگى ديرەكتورى كاگلا گيراي اقپارات اگەنتتىگىنە «سەنارييدە سيپاتتالعان ويدان شىعارىلعان وشاق بولجام ەمەس. وقۋ-جاتتىعۋداعى قوزدىرعىش قاتىسۋشىلارعا قوعامدىق دەنساۋلىق ساقتاۋ سالاسىنداعى اۋقىمدى توتەنشە جاعدايلار كەزىندە بولجاۋعا بولاتىن ساياسي ديلەممالاردىڭ تۇرلەرىمەن كۇرەسۋگە كومەكتەسەتىن وقىتۋ ءادىسى رەتىندە ويلاستىرىلعان».
SEERS – بۇل پاندەميا كەزىندە ارەكەت ەتۋ ءۇشىن ادامدار ويلاپ تاپقان ۆيرۋس. 2025 جىلى قانداي دا ءبىر ينفەكسيانىڭ تارالاتىنىنا ەشقانداي دالەل جوق.