وسىلايشا، سارى ءتۇستى اۆتوبۋستار الماتىداعى تاعى 27 مەكتەپتىڭ وقۋشىلارىن تاسىمالدايدى. بۇل تۋرالى الماتى قالاسى ءبىلىم باسقارماسىنىڭ باسشىسى ءلاززات جىلقىبايەۆا ءماسليحاتتىڭ كەزەكتەن تىس سەسسياسى بارىسىندا دەپۋتاتتاردىڭ سۇراعىنا جاۋاپ بەردى، دەپ حابارلايدى almaty-akshamy.kz
ونىڭ ايتۋىنشا، مونيتورينگ بارىسىندا مەكتەپكە قاتىناۋى قيىن قالانىڭ شالعاي جەرىندە تۇراتىن 8258 وقۋشى انىقتالدى. جاعدايدى ءجىتى زەرتتەۋدەن كەيىن «مەكتەپ اۆتوبۋسى» جوباسىن جالعاستىرۋ اياسىندا وقۋشىلاردى كوپتەپ تاسىمالداۋ تۋرالى شەشىم قابىلداندى.
«الماتى اكىمىنىڭ تاپسىرماسىمەن پيلوتتىق جوبا اياسىندا بيىل 30 مەكتەپكە 100 اۆتوبۋس ساتىپ الىندى. اتا-انالاردىڭ ءوتىنىشىن زەردەلەپ، الاتاۋ مەن تۇركسىب اۋدانىنداعى تاعى 5 مەكتەپتىڭ وقۋشىلارىن تاسىمالداۋ جوسپارلانعان. بۇل جەكەلەگەن اۋداندا تۇراتىن وقۋشىلاردىڭ قاتىناۋىن قامتاماسىز ەتەدى»، - دەدى ءلاززات جىلقىبايەۆا.
ەستەرىڭىزگە سالا كەتەيىك، «مەكتەپ اۆتوبۋسى» جوباسى بيىل الماتىدا اكىم ەربولات دوسايەۆتىڭ تاپسىرماسىمەن جۇزەگە استى. وعان قالا بيۋدجەتىنەن 5 ميلليارد تەڭگەگە 100 ارنايى اۆتوبۋس ساتىپ الدى.
2024 جىلى تاعى 100 اۆتوبۋس ساتىپ الىپ، شاھاردىڭ قوسىمشا 27 مەكتەبىن قامتۋ كوزدەلىپ وتىر.