2024 جىلى زەينەتكەرلىك جاسقا دەيىنگى ادامداردى جۇمىسپەن قامتۋعا جاردەمدەسۋ جونىندەگى «كۇمىس جاس» جوباسىن ىسكە اسىرۋ شەڭبەرىندە 19 199 ادام جۇمىسقا ورنالاستىرىلدى.
جۇمىسقا ورنالاسقانداردىڭ ەڭ كوپ سانى تۇركىستان (2 441 ادام)، جامبىل (1 845 ادام) جانە قاراعاندى (1 471 ادام) وبلىستارىندا بايقالادى، دەپ حابارلايدى aqshamnews.kz.
جوباعا قاتىساتىن ايەلدەردىڭ ۇلەسى 55،2% نەمەسە 10،6 مىڭ ادامدى، اۋىل تۇرعىندارىنىڭ ۇلەسى – 11،3 مىڭ ادامدى نەمەسە 59،1% قۇرايدى.
بۇل جوباعا 50 جاستان اسقان جۇمىسسىز ادامدار زەينەتكەرلىك جاسقا تولعانعا دەيىن قاتىسا الادى. جوباعا قاتىسۋ ءۇشىن مانساپ ورتالىعىنا ءوتىنىش بەرۋ قاجەت.
«كۇمىس جاس» جوباسىن قارجىلاندىرۋدى ەڭبەك موبيلدىلىگى ورتالىعى جۇمىس بەرۋشىنىڭ جوبا شەڭبەرىندە جۇمىسقا ورنالاستىرىلعان جۇمىسسىزدارعا ەڭبەكاقى تولەۋگە جۇمساعان شىعىندارىنىڭ ءبىر بولىگىن وتەۋگە سۋبسيديالار بەرۋ جولىمەن جۇزەگە اسىرادى.
سۋبسيديالار مولشەرى جۇمىستىڭ العاشقى جىلىندا جالاقى مولشەرىنىڭ 70% (ءبىراق 30 اەك-تەن اسپايتىن)، جۇمىستىڭ ەكىنشى جىلىندا جالاقى مولشەرىنىڭ 65% (ءبىراق 30 اەك-تەن اسپايتىن)، جۇمىستىڭ ءۇشىنشى جىلىندا جالاقى مولشەرىنىڭ 60% (ءبىراق 30 اەك-تەن اسپايتىن) قۇرايدى.
«كۇمىس جاس» جوباسىنا قاتىسۋ مەرزىمى اياقتالعاننان كەيىن جۇمىس بەرۋشى زەينەتكەرلىك جاسقا تولماعان ادامدى كەمىندە 1 جىل مەرزىمگە تۇراقتى جۇمىس ورنىنا، سونداي-اق زەينەتالدى جاسقا دەيىنگى ادامدى زەينەتكە شىققانعا دەيىن جۇمىسقا ورنالاستىرۋعا مىندەتتى.
كوپتەگەن قازاقستاندىقتار جوبا تۋرالى وڭ پىكىر بىلدىرۋدە.
«مەن «كۇمىس جاس» جوباسى بويىنشا «زەردە» ءدارىحاناسىنا جۇمىسقا ورنالاستىم. جۇمىس ايتارلىقتاي اۋىر ەمەس، ەڭبەكاقىمىزدى ۋاقتىلى الىپ جاتىرمىز. قازىرگى كەزدە ءبىز سياقتى 50 جاستان اسقان ادامدارعا جۇمىس تابۋ وڭاي ەمەس. وسىنداي جوبالاردىڭ ارقاسىندا كوپتەگەن ازاماتتار «ەكى قولعا ءبىر كۇرەك» تابۋدا»، – دەپ، تۇركىستان وبلىسىنىڭ تۇرعىنى زەينەكۇل بۇركىتباي ءوز ويىمەن ءبولىستى.