ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن جوعارى عىلىمي-تەحنيكالىق كوميسسيا وتىرىسىندا عىلىمدى دامىتۋدىڭ 2024-2026 جىلدارعا ارنالعان باسىم باعىتتارىن ايقىنداۋ ماسەلەسى قارالدى.
وتىرىستى اشقان ۇكىمەت باسشىسى كۇنى كەشە عانا دۇنيەجۇزىلىك زياتكەرلىك مەنشىك ۇيىمى 2023 جىلعا ارنالعان جاھاندىق يننوۆاسيالىق يندەكستى جاريالانعانىن اتاپ ءوتتى. ول عىلىمعا، ءبىلىم بەرۋ جۇيەسىنە جانە ينفراقۇرىلىمعا قاتىستى 80-گە جۋىق كورسەتكىشتى قامتيدى، دەپ حابارلايدى Almaty-akshamy.kz Primeminister.kz سايتىنا سىلتەمە جاساپ.
«قازاقستان ءۇندىستان مەن يراننان كەيىن ورتالىق جانە وڭتۇستىك ازيا ايماعى بويىنشا ۇزدىك 3 يننوۆاسيالىق ەكونوميكانىڭ قاتارىنا ەندى. سيفرلىق دامۋ، عىلىم جانە جوعارى ءبىلىم مينيسترلىكتەرى ەلىمىزدىڭ حالىقارالىق ارەناداعى پوزيسيالارىن جاقسارتۋ ءۇشىن عالىمدارعا قاجەتتى جاعداي جاساۋ جانە ينفراقۇرىلىمدى دامىتۋ جۇمىستارىن جالعاستىرۋى كەرەك»، - دەدى ءاليحان سمايىلوۆ.
ۆەدومستۆو باسشىسى ساياسات نۇربەك حالىقارالىق تاجىريبەنى، اتاپ ايتقاندا، ەۋروپالىق وداق ەلدەرى، كانادا، اۆستراليا، مالايزيا، يسپانيا جانە باسقا دا مەملەكەتتەردى، سونداي-اق مەملەكەت باسشىسىنىڭ حالىققا جولداۋىندا جانە باسقا دا باعدارلامالىق قۇجاتتاردا بەلگىلەنگەن ستراتەگيالىق مىندەتتەردى ەسكەرە وتىرىپ، الداعى جىلدارعا ارنالعان عىلىمدى دامىتۋدىڭ التى باسىم باعىتى ازىرلەنگەنىن ايتتى. ۇلتتىق قاۋىپسىزدىكتى قامتاماسىز ەتۋ باعىتى جەكە قاراستىرىلاتىن بولادى.
بۇل تىزىمگە «ەكولوگيا، قورشاعان ورتا جانە تابيعاتتى ۇتىمدى پايدالانۋ»، «ەنەرگيا، وزىق ماتەريالدار جانە كولىك»، «وزىق ءوندىرىس، سيفرلىق جانە عارىشتىق تەحنولوگيالار»، «ەلدىڭ زياتكەرلىك الەۋەتى»، «ءومىر جانە دەنساۋلىق تۋرالى عىلىم» جانە «اگروونەركاسىپ كەشەنىن تۇراقتى دامىتۋ» باعىتتارى ەندى. ءوز كەزەگىندە، باعىتتاردىڭ ءارقايسىسى 8-دەن 18-گە دەيىنگى بولىكتەردەن تۇرادى.
جالپى، بەلگىلەنگەن باسىمدىقتار شەڭبەرىندە سۋ رەسۋرستارىن ۇتىمدى پايدالانۋ، توپىراق ساپاسىن ساقتاۋ، ەنەرگەتيكالىق قاۋىپسىزدىكتى (سونىڭ ىشىندە جىلۋ ەنەرگياسىن) قامتاماسىز ەتۋ، پارنيكتىك گازدار شىعارىندىلارىن ازايتۋ جانە جاڭارتىلاتىن كوزدەردى دامىتۋ ماسەلەلەرىنە نازار اۋدارىلادى.
سونىمەن قاتار قۇرىلىس، ماشينا جاساۋ، ونەركاسىپ، كولىك تەحنولوگيالارى، روبوتوتەحنيكا، جاساندى ينتەللەكت، جاڭا ماتەريالدار جاساۋ، تەلەكوممۋنيكاسيا، مەديسينا، فارماسيەۆتيكا، مال شارۋاشىلىعى، ەگىنشىلىك، اۋىل شارۋاشىلىعى ونىمدەرى مەن شيكىزاتىن وڭدەۋ جانە ساقتاۋ، تاماق ونىمدەرىن ءوندىرۋ جانە ت.ب. سالالارىندا زەرتتەۋلەردى قولداۋ جوسپارلانىپ وتىر. جاراتىلىستانۋ عىلىمدارى سالاسىنداعى ىرگەلى جانە قولدانبالى زەرتتەۋلەر دە قاراستىرىلعان.
تالقىلاۋ جانە داۋىس بەرۋ ناتيجەلەرى بويىنشا جوعارى عىلىمي-تەحنيكالىق كوميسسيا اتالعان تاسىلدەردى ماقۇلدادى.
سونىمەن قاتار جيىندا 2024-2026 جىلدارعا ارنالعان باسىم باعىتتار بويىنشا قارجىلاندىرۋ كولەمىن ءبولۋ جانە عىلىمي-تەحنيكالىق مىندەتتەردى جۇزەگە اسىرۋ ماسەلەلەرى قارالدى.