مەملەكەت باسشىسى قاسىم-جومارت توقايەۆ «2023 – 2025 جىلدارعا ارنالعان رەسپۋبليكالىق بيۋدجەت تۋرالى» زاڭعا قول قويدى. اتالعان زاڭ جوباسى اياسىندا 2023 جىلدىڭ 1 قاڭتارىنان باستاپ زەينەتاقى تولەمدەرىنىڭ مولشەرىنە وزگەرىس ەنگىزىلەدى، - دەپ حابارلايدى almaty-akshamy.kz قازاقپارات ساراپشىسىنا سىلتەمە جاساپ..
«2023-2025 جىلدارعا ارنالعان رەسپۋبليكالىق بيۋدجەت تۋرالى» ق ر زاڭىنا سايكەس، 2023 جىلدىڭ 1 قاڭتارىنان باستاپ ىنتىماقتى جانە بازالىق بولىكتەردەن تۇراتىن زەينەتاقىنىڭ ەڭ تومەنگى مولشەرى 77 417 تەڭگەنى قۇرايدى. بۇل رەتتە ىنتىماقتى بولىگى 53 076 تەڭگە بولىپ بەلگىلەنىپ، بازالىق زەينەتاقىنىڭ ەڭ تومەنگى مولشەرى 24 341 تەڭگەگە وزگەرەدى.
سونداي-اق زەينەتاقى تولەمدەرىنە باعىتتالعان قاراجات جاسىنا بايلانىستى جانە ەڭبەك ەتكەن جىلدارى ءۇشىن زەينەتاقى تولەمدەرىن 10،5 پايىزعا ارتتىرۋ قاراستىرىلعان.
ءبىرىڭعاي جيناقتاۋشى زەينەتاقى قورى زەينەتاقى قاراجاتىن مەرزىمىنەن بۇرىن پايدالانۋدىڭ 2023 جىلعا ەڭ تومەن جەتكىلىكتىلىك شەگىن بەلگىلەدى. قور مالىمەتىنشە، 2023 جىلعا بەلگىلەنگەن ەڭ تومەن جەتكىلىكتىلىك شەگى جاس مولشەرىنە بايلانىستى 3-تەن 10 ميلليون تەڭگەگە دەيىنگى سوما بولادى. بەكىتىلگەن ادىستەمەگە سايكەس، ەڭ تومەنگى جەتكىلىكتى شەك شامالارى ءار جاس مولشەرى ءۇشىن جەكە انىقتالادى جانە بولاشاق زەينەتاقى تولەمدەرى مەن زەينەتاقى جارنالارىنىڭ ءوسۋىن (يندەكستەلۋىن) ەسكەرەدى.
ناقتىراق ايتقاندا، ەڭ تومەنگى جەتكىلىكتىلىك شەگى - بۇل سالىمشىنىڭ زەينەتكە شىققاننان كەيىن ەڭ تومەنگى بازالىق زەينەتاقىمەن قوسا ەڭ تومەنگى زەينەتاقىدان كەم ەمەس جيىنتىق تولەمدەر الۋى ءۇشىن شوتىندا قالۋعا ءتيىستى ەڭ تومەنگى سوما.
وسىلايشا، 2023 جىلى 20 جاستاعى سالىمشى زەينەتاقى شوتىنداعى 3 ملن 260 مىڭنان، 30 جاستاعى سالىمشى 4 ملن 580 مىڭنان، 40 جاستاعى سالىمشى 6 ملن 100 مىڭنان، 50 جاستاعى سالىمشى 7 ملن 860 مىڭنان، 60-62 جاستاعى سالىمشىلار 9 ملن 890 مىڭنان اسقان سومانى مەرزىمىنەن بۇرىن پايدالانا الادى.
ايتا كەتەيىك، پرەزيدەنت قاسىم-جومارت توقايەۆ قازاقستان حالقىنا جولداۋىندا ايەلدەردىڭ زەينەتكە شىعۋ جاسى 2029 جىلعا دەيىن 61 جاس دەڭگەيىندە قالاتىنىن مالىمدەگەن ەدى. بۇعان دەيىن قازاقستاندا ايەلدەردىڭ زەينەتكە شىعۋ جاسىن 63 جاسقا دەيىن كەزەڭ-كەزەڭىمەن ارتتىرۋ جوسپارلانعان بولاتىن.