بيىل قازنەت پايدالانۋشىلارى جالعان حابارلامالاردى كوپ تاراتىپ، ءبولىسۋدى جالعاستىردى.
كونسپيرولوگتار ءالى دە بولسا، بارلىق قيىندىقتارعا الەمدىك ۇكىمەتتى كىنالايدى. ءبىراق بۇل قاۋىمداستىققا كىمنىڭ كىرەتىنى بەلگىسىز بولعاندىقتان فەيكتەردە ناقتى كەيىپكەرلەردىڭ ەسىمى ءجيى اتالادى. Stopfake.kz سايتى 2023 جىلى فەيك جاڭالىقتاردا ەڭ كوپ اتالعانداردى اتاپ وتكەن، دەپ حابارلايدى Almaty-akshamy.kz.
بيلل گەيتس
فەيكتەردىڭ كوبىندە امەريكالىق كاسىپكەر بيلل گەيتس تۋرالى ايتىلادى. قاستاندىق تەورياسىن جاقتاۋشىلاردىڭ پىكىرىنشە، ولىمگە اكەلەتىن ءقاۋىپتى ۆاكسينالاردى ناق وسى Microsoft كومپانياسى شىعارادى. ونىڭ ءۇندىستان، افريكا جانە وڭتۇستىك سۋدان ەلدەرىندە بالالاردىڭ ولىمىنە اكەلگەن تۇرعىنداردى يممۋنداۋعا قاتىسى بار ەكەن. سونداي-اق، فيلانتروپ ادامداردى باقىلاۋ جاساۋ ءۇشىن حالىقتى چيپتەيدى، بۇكىل مال شارۋاشىلىعىن جويۋعا جانە شاققاننان كەيىن ادامدا ەتكە اللەرگيا تۋدىراتىن گەنەتيكالىق تۇرلەندىرىلگەن كەنە جاساۋعا قاراجات سالادى دەيدى.
گەيتستىڭ ءوزى مۇنىڭ ءبارى وتىرىك جانە مۇنداي مالىمدەمەلەر ادامدار اراسىندا ارازدىق تۋدىرادى دەپ بىرنەشە رەت ايتتى. ونىڭ سوزىنشە، ادامزات ۆاكسيناسيانى الاياقتىق دەپ ساناسا، ادامدار اۋرۋدان قايتىس بولادى. كونسپيرولوگتار كەلتىرگەن بارلىق فاكتىلەردى الەمدىك ب ا ق پەن فاكچەكەرلەر بىرنەشە رەت جوققا شىعاردى.
روكفەللەر اۋلەتى
جالعان مازمۇندى جاساۋشىلار ميللياردەر روكفەللەر اۋلەتىنىڭ ەسىمدەرىن ءجيى قولدانادى. ءتىپتى ونىمەن اتتاس ادامداردى دا اتايدى. روكفەللەر جاھاندىق الەمدىك داعدارىستى باستاۋشىلاردىڭ ءبىرى ەكەن. بۇل وتباسىنىڭ جاھاندىق ۇكىمەت ورناتۋ بويىنشا جاسىرىن جوسپارلارى بار، شاڭىراقتى شايقالتۋ ءۇشىن ولار فەمينيزمدى دە ويلاپ تاپقان.
بانكير ديەۆيد روكفەللەر تۋرالى دا ءتۇرلى قاۋەسەتتەر تارادى. ەڭ سوڭعى جانە اتىشۋلى مالىمدەمەلەردىڭ ءبىرى قازان ايىندا تارادى. Instagram-دا بانكيردىڭ داۋىسىنىڭ اۋديوجازباسى جاريالاندى، وندا ول ءوزىنىڭ وتباسى مەن ولاردىڭ جاقتاستارى بۇقارالىق اقپارات قۇرالدارى ءۇنسىز جاتقاندا، الەمدە ءوز ءتارتىبىن ورناتقانىن ايتادى. ارينە، جازبا جالعان بولىپ شىقتى.
يلون ماسك
تابىستى امەريكالىق ينجەنەر ءارى كاسىپكەر يلون ماسكتىڭ تانىمالدىلىعى كوپ ادامعا مازا بەرمەي وتىر. فەيك جاساۋشىلار ميللياردەرگە ادامنىڭ ەركى مەن اقىل-ويىن باقىلاۋ ءۇشىن ميعا چيپ سالۋعا رۇقسات بەرىلگەنى تۋرالى ايتتى. ماسكتىڭ مۇنداي رۇقساتى بار ەكەنى راس بولىپ شىقتى. ءبىراق بۇل سال اۋرۋىنا شالدىققان ادامدارعا زاماناۋي گادجەتتەردى باسقارۋعا كومەكتەسەتىن يمپلانتتى ەنگىزۋگە ارنالعان.
ماسك قارجىلاندىراتىن Starlink سپۋتنيگىن ۇشىرعاننان كەيىن جەلىدە فەيك كوپ تارادى. حابارلامالاردىڭ بىرىندە اۆتور عارىش كەمەسى تۋرالى كومپيۋتەرلىك ويىننان الىنعان ۆيدەونىڭ ءۇزىندىسىن سپۋتنيك دەپ ۇسىنعان. Starlink جوعارىدا بىرەۋلەرگە جۇك جەتكىزەدى دەپ ايتىلدى. تەكسەرۋدەن كەيىن جەلىدە تاراعان ۆيدەونىڭ سپۋتنيككە ەشقانداي قاتىسى جوق ەكەنى انىقتالدى.
گرەتا تۋنبەرگ
شۆەد ەكو-بەلسەندىسى گرەتا تۋنبەرگ 2018 جىلى 15 جاسىندا پيكەتكە جالعىز شىعىپ، جەلىدە تانىمال بولدى. ول كەزدە وقۋشى بيلىكتەن كليماتتىڭ وزگەرۋىنە نازار اۋدارۋدى سۇراعان بولاتىن. ۋاقىت وتە كەلە ونىڭ ەسىمى جاڭالىقتاردا سيرەك ايتىلاتىن بولدى، ءبىراق فەيك اقپارات شىعارۋشىلار ونى ۇمىتپايدى. ولار 2023 جىلى گرەتانىڭ اتىنان بىرنەشە جالعان اڭگىمە ويلاپ تاپتى. ول قىتايدى اعاشتاردى ساقتاۋ ءۇشىن ءداستۇرلى تاياقشالاردان باس تارتۋعا شاقىرعان ەكەن.تۋنبەرگ مۇنداي مالىمدەمە جاساماعان. تاعى ءبىر فەيك جاڭالىق اسكەري ءىس-قيمىلداردارعا قاتىستى بولدى. ۆيدەودا گرەتانىڭ ءسوزىن دىبىستاعان داۋىس سوعىس كەزىندە «ەكولوگيالىق» قارۋدى، اتاپ ايتقاندا ءقاۋىپسىز تانكتەردى، ۆەگاندىق گراناتالاردى جانە بيولوگيالىق ىدىرايتىن زىمىرانداردى قولدانۋعا شاقىرعان. شىندىعىندا، بۇل الەۋمەتتىك جەلىلەردە تەز تاراعان ءازىل بولىپ شىقتى.
تاعى ءبىر ازىلكەش تۋنبەرگتى بانكير ءروتشيلدتىڭ شوبەرەسى دەپ پايىمداعان. ءار ءتۇرلى ەلدەردەگى پايدالانۋشىلار بۇل حابارلامانى دا قىزۋ تالقىلادى. ءبىراق ەكو-بەلسەندى مەن الەمدەگى باي جانە بەدەلدى وتباسىلاردىڭ ءبىرىنىڭ اراسىندا ەشقانداي بايلانىس انىقتالعان جوق.
سيمپسوندار
ەڭ تانىمال مۋلتفيلمدەگى ساۋەگەي وتباسىلاردىڭ ءبىرى ءالى كۇنگە دەيىن كوپتەگەن فەيكتەردە ايتىلىپ ءجۇر. بۇل ويدان شىعارىلعان تۇلعالار بولسا دا، جالعان جاڭالىقتارعا لايىق. جەلىدەگى جاريالانىمداردىڭ بىرىندە سيمپسونداردىڭ ۇكىمەتتى اشكەرەلەيدى دەلىنگەن. بىرنەشە مۋلتسەريالدان قۇراستىرىلعان (ونىڭ ەكەۋى سيمپسوندار تۋرالى ەمەس!) روليكتە بيلىك اۋا رايىمەن مانيپۋلياسيالار جاساپ، قولدان اپاتتار تۋدىراتىنى ايتىلعان. بۇعان ۇلەس قوسقان قۇپيا وركەنيەتتەر، ادامداردى ۋلايتىن حيمترەيلدەر تۋرالى دا ءسوز قوزعالادى. مۇنىڭ وتىرىك ەكەنى انىق. كەلەسى ءبىر جاڭالىقتا سيمپسوندار Silicon Valley Bank كۇيرەۋىن بولجايدى. شىندىعىندا، مۋلتفيلمدە بانكتىڭ اتاۋى ادامداردى شاتاستىرۋ ءۇشىن وزگەرتىلگەن. سونداي-اق ولار گاۆاييدە ءورت بولاتىنىن جانە ەلەكتروماگنيتتىك يمپۋلس سالدارىنان ەلەكتر قۋاتى وشەتىنىن بولجاعان ەكەن. مۋلتفيلم كەيىپكەرلەرىنىڭ بارلىق بولجامدارى فەيك بولىپ شىقتى.